ખંભાળિયામાં પૈસાની લેતી-દેતી બાબતે ગર્ભિત ધમકીથી યુવતીએ ઝેર ગટગટાવ્યું..
ઘરમાં ઘૂસી તોડફોડ કર્યાની ચાર શખસ સામે ફરિયાદ
દેશ દેવી ન્યુઝ નેટવર્ક ખંભાળિયા: ૩૦. દ્વારકા જિલ્લાના મુખ્યમથક ખંભાળિયામાં પૈસાના મામલે યુવતિના ઘરે ધસી આવી બાથરૂમમાં તોડફોડ કરતા ભોગગ્રસ્તે ઝેરી દવા પી લીધાનો બનાવ બહાર આવ્યો છે.પોલીસે ચાર સામે ગુનો નોંધી શોધખોળ સાથે વધુ તપાસ હાથ ધરી છે.
પોલીસસુત્રોમાંથી જાણવા મળતી વિગત અનુસાર ખંભાળીયા શહેરમાં રહેતા નિકિતાબેનએ આરોપી કુલદીપ દલવાડી નામના શખ્સ પાસેથી પચાસ હજાર રૂપિયા લીધા હતા અને આ રૂપિયા આરોપી પરેશ ઉર્ફે મુનિયાને આપ્યા હતા.
જે મુનિયો પરત આપતો ન હોય કુલદીપે નિકિતાબેન પાસેથી રૂપિયાની માંગણી કરતા નિકિતાબેનએ કુલદીપને રૂપિયા આપવાની ના પાડતા મનદુ:ખ થયું હતું.
બાદમાં તેમની સાથેના આરોપી કુલદીપ, ભરત ભારવાડિયા, આશિષ ભારવાડિયા, પરેશ ઉર્ફે મુનિયા નામના શખ્સો એક સંપ થઈ લાકડી, પાઇપ, તલવાર લઈ નિકિતાબેનના ઘરમાં પ્રવેશ કરી નિકિતાબેનને બેફામ ગાળો આપી હતી. એટલું જ નહીં પાઇપ વડે સામાન્ય ઇજાઓ પહોંચાડી બાથરૂમનો દરવાજો તોડી નુકશાન પહોચાડ્યું હતું.
વધુમાં નિકિતાબેન આરોપીને રૂપિયા નહિ આપે તો તેણીને ચારેય આરોપીઓ જાનથી મારી નાખવાની ગર્ભિત ધમકી આપી હતી. જે નિકિતાબેનને મનમાં લાગી આવતા પોતાના ઘરે પોતાની જાતે ઝેરી દવા પી લીધી હોવાનું પોલીસ ફરિયાદમાં જાહેર થયું છે.
આ સમગ્ર મામલે ખંભાળીયા પોલીસે ઉપરોક્ત આરોપીઓ સામે ગુન્હો નોંધી આગળની કાર્યવાહી હાથ ધરવામાં આવી છે.આથી ખંભાળિયા પંથકમાં ચકચાર મચી જવા પામી છે.
