લાલપુરમાં બનેવીને ઘેર આંટો દેવા આવેલા ભાણવડ પંથકના ૩૨ વર્ષ ના યુવાનનું હાર્ટ ફેઇલ થઈ જતાં અપમૃત્યુ
દેશ દેવી ન્યૂઝ જામનગર તા ૨૦ ફેબ્રુઆરી ૨૪, ભાણવડ તાલુકા ના મેવાસા ગામનો ૩૨ વર્ષનો દલિત યુવાન ગઈકાલે રાત્રે લાલપુરના ધરાર નગર વિસ્તારમાં રહેતા પોતાના બનેવી ને ઘેર આંટો દેવા માટે આવ્યો હતો, દરમિયાન તેનું હાર્ટ ફેઈલ થઈ જતાં મૃત્યુ નીપજયું છે. જેથી પરિવારજનોમાં શોકમગ્ન વાતાવરણ બની ગયું છે.
આ બનાવની વિગત એવી છે કે ભાણવડ તાલુકાના મેવાસા ગામમાં રહેતો રાજુ ઉર્ફે રાજેશ મેઘાભાઈ ચાવડા નામનો ૩૨ વર્ષનો યુવાન, કે જે ગઈકાલે રાત્રે લાલપુરના હુસેની ચોક વિસ્તારમાં રહેતા પોતાના બનેવીને ઘેર રોકાવા માટે આવ્યો હતો, અને રાત્રે રોકાણ કર્યા પછી આજે સવારે તેને હૃદય રોગનો હુમલો આવી ગયો હતો, અને તેનું હાર્ટ ફેઈલ થઈ જતાં મૃત્યુ નિપજ્યું હોવાનું લાલપુર ની સરકારી હોસ્પિટલના તબીબો દ્વારા જાહેર કરાયું હતું.
આ બનાવ અંગે મૃતક ના પિતા મેઘાભાઈ આલાભાઇ ચાવડાએ પોલીસને જાણ કરતાં લાલપુરના પોલીસ હેડ કોન્સ્ટેબલ એન.પી. વસરા બનાવના સ્થળે તેમજ લાલપુર ની સરકારી હોસ્પિટલે દોડી ગયા હતા, અને રાજેશ ચાવડાના મૃતદેહ નો કબજો સંભાળી પોસ્ટ મોર્ટમ સહિતની કાર્યવાહી હાથ ધરી હતી.મૃતક યુવાનને જુની વાલની તથા માનસિક બીમારી હતી, અને અમદાવાદની સિવિલ હોસ્પિટલમાં તેની સારવાર પણ ચાલતી હતી. દરમિયાન આજે સવારે તેનું હાર્ટ ફેઈલ થઈ ગયું હોવાનું પોસ્ટમોર્ટમના રિપોર્ટમાં જાહેર કરાયું છે. આ બનાવને લઈને મૃતકના પરિવારમાં શોક નુ મોજું ફરી વળ્યું છે.
