જામનગરમાં પેટ્રોલપંપની ઓફિસમાંથી રૂા. ૩૫ હજારની ચોરી
- મધરાતે બાઇક પર આવેલ બે શખ્સો બાથરૂમ જવાનું કહી ઓફિસના ટેબલના ખાનામાં રાખેલી રોકડ ઉપાડી ગયા
- સમગ્ર ઘટના સીસીટીવી કેમેરામાં કેદ થયા પછી પોલીસ દ્વારા તસ્કરોની ઓળખ મેળવવા કાર્યવાહી હાથ ધરાઈ
દેશ દેવી ન્યૂઝ જામનગર તા. ૨૭ એપ્રિલ ૨૪ જામનગર શહેરના લાખોટા તળાવની પાળે આવેલ પરિમલ ટ્રેડર્સ નામના પેટ્રોલ પંપની ઓફિસમાંથી બે શખ્સોએ રોકડા રૂપિયા ૩૫,૩૭૦ ની ચોરી કરી રફુચકકર થઈ જતાં ચકચાર જાગી છે.
આ બનાવની વિગત એવી છે કે શહેરના તળાવની પાળેઆવેલા પરિમલ ટ્રેડર્સ પેટ્રોલ પંપ ગત તા. ૨૫.૪. ના રોજ મધરાતે દોઢ વાગ્યાના અરસામાં મોટરસાયકલ પર બે શખ્સો પેટ્રોલ પૂરાવવા માટે આવેલાં અને ચોકીદરે તેમને પેટ્રોલ પંપ બંધ છે. તેવું જણાવતા મોટર સાયકલની પાછળ બેઠેલા શખ્સે બાથરૂમ જવાનું કહી પેટ્રોલ પંમાં અંદર આવી ઓફિસનું શટર થોડું ખુલ્લુ હોય તેમાંથી અંદર પ્રવેશ મેળવી લીધો હતો. ઓફિસના ટેબલના ખાનામાં રાખેલ રોકડ રૂપિયા ૩૫,૩૭૦ ની ચોરી કરી રફુચકકર થઈ ગયા હતાં.
આ બનાવ અંગે બીજા દિવસે પેટ્રોલ પંપ ના મેનેજર દિપકભાઈ છત્રાળાને ધ્યાને આવતાં સીસીટીવી ચેક કરતાં ચોરી થઇ હોવાનું ખૂલતાં તેમણે અજાણ્યા ચોર વિરૂદ્ધ સિટી એ. ડીવીજન પોલીસ મથકમાં ફરિયાદ નોંધાવતા પોલીસે ગુનો નોંધી વધૂ તપાસ હાથ ધરી છે.
