જામનગરના કાલાવડનાકા બહાર જૂની અદાવતમાં ધીંગાણું..
માતા-પુત્રી સહિત ચાર પર હુમલો : બે શખસ સામે ફરિયાદ..
દેશ દેવી ન્યુઝ નેટવર્ક જામનગર ૨૬ : જામનગરના કાલાવડનાકા બહાર રંગુનવાલા હોસ્પીટલ પાસે સાટીવાડમાં ગઇ સાંજે જુની અદાવતમાં મહિલા સહિત ચાર પર હુમલો કરવામાં આવતા ચકચાર ફેલાઇ હતી, પોલીસે ફરીયાદના આધારે બે શખ્સ સામે ગુન્હો નોંધી તપાસ આગળ વધારી છે.
રંગુનવાલા હોસ્પીટલ પાસે સાટીવાડમાં રહેતા ઇબ્રાહીમ ઉર્ફે ઉસ્તાદ અબ્દુલ સતાર વજબાણી (ઉ.વ.51)એ સીટી-એ માં મસીતીયા ગામના આદમ ખફી અને અજાણ્યા શખ્સ સામે આઇપીસી કલમ 324, 323, 504, 114, જીપીએકટ 135(1) મુજબ એવી ફરીયાદ કરી છે કે ગઇકાલે સાટીવાડ ખાતે ફરીયાદીના સાળીના દિકરા સાથે અગાઉ આરોપી આદમને બોલાચાલી થઇ હતી.
જેનો ખાર રાખીને આદમે ફરીયાદીને અપશબ્દો બોલી ઢીકાપાટુનો માર માર્યો હતો આ વેળાએ વચ્ચે છોડાવા પડતા તેમના પત્ની કસાનાબેનને છરી વડે છરકા કરવામાં આવ્યા હતા ઢીકાપાટુનો માર મારવામાં આવ્યો હતો.
દરમ્યાનમાં આરોપીની સાથે રહેલા અજાણ્યા ઇસમે ફરીયાદીના પત્ની કસાનાબેન તથા પુત્રી સનાબાનુ તથા ફરીયાદીના સાળાની દિકરી ફરઝાનાને પાઇપ વડે આડેધડ ઘા મારી મુંઢ ઇજાઓ પહોચાડી હતી.
ઇજાગ્રસ્તોને સારવાર માટે જી.જી. હોસ્પીટલ લઇ જવામાં આવ્યા હતા, ફરીયાદના આધારે પોલીસ દ્વારા આરોપીઓની શોધખોળ આદરી હતી, બનાવના પગલે આ વિસ્તારમાં ચકચાર ફેલાઇ હતી.
