ભારે કરી: પત્નીનો ફોટો મોબાઈલમાં રાખવા બાબતે યુવાનને હત્યાની ધમકી

ભાણવડ પંથકમાં પત્નીનો ફોટો મોબાઈલમાં રાખવા બાબતે યુવાનને હત્યાની ધમકી

દેશ દેવી ન્યુઝ જામનગર તા.૯ જૂન ૨૩ ખંભાળિયા: ભાણવડ તાલુકામાં રહેતા રામદે જેઠાભાઈ પરમાર નામના 19 વર્ષના ડફેર યુવાનને રાણપર ગામના સીદીયા ભીમા તથા ટીંબડી ગામના રામકા રાયદે સોલંકી નામના બે શખ્સોએ ફોન કરીને કપુરડી ગામના પાટીયા પાસેના ચેકડેમ નજીક બોલાવ્યો હતો. જ્યાં આરોપી શખ્સોએ ફરિયાદી રામદે જેઠાભાઈને બિભત્સ ગાળો કાઢી, છરી બતાવીને જાનથી મારી નાખવાની ધમકી આપતા ભાણવડ પોલીસ મથકમાં ફરિયાદ નોંધાવવામાં આવી છે.

પોલીસ સૂત્રમાંથી જાણવા મળતી વિગત મુજબ ફરિયાદી રામદેભાઈના પત્નીનો ફોટો આરોપી રામકા સોલંકીએ પોતાના મોબાઈલમાં રાખ્યો હતો. જેથી ફરિયાદી રામદેભાઈએ આરોપી રામકાની પત્નીનો ફોટો પોતાના મોબાઈલમાં રાખ્યો હતો. આ બાબતે થયેલા મનદુ:ખમાં ઉપરોક્ત બનાવ બન્યો હોવાનું પોલીસ ફરિયાદમાં જાહેર થયું છે. આ સમગ્ર બનાવ અંગે પોલીસે આઈ.પી.સી. કલમ 323, 504, 506 (2), 114 તથા જી.પી. એક્ટની કલમ મુજબ ગુનો નોંધ્યો છે.