મીઠાપુર નજીકના હમુસર ગામમાં પાણીમાં ડૂબી જતા યુવાનનું મોત
રેસ્ક્યુ ટીમની લાંબી જહેમત બાદ પાણીમાંથી યુવાનનો મૃતદેહ સાંપડ્યો
દેશ દેવી ન્યુઝ નેટવર્ક મીઠાપુર: મીઠાપુર નજીકના હમુસર વિસ્તારમાં રહેતા મુસ્લિમ પરિવારના ત્રણ યુવાનો ગઈકાલે ગુરુવારના રોજ હમુસર ગામ ખાતે આવેલી પાણી ભરેલી એક ખેત તલાવડીમાં સાંજે આશરે સાડા ચારેક વાગ્યે નહાવા પડ્યા હતા. તરતા ન આવડતું હોવા છતાં પણ પાણીમાં ન્હાવા ઉતરેલા આ યુવાનો ડૂબવા લાગ્યા હતા.
જે પૈકી બે યુવાનો યેન-કેન પ્રકારે કાંઠા સુધી પહોંચી જવામાં સફળ થયા હતા. આશરે પચીસેક ફૂટ જેટલા ઊંડા અને આખા ભરેલા આ તળાવમાં હમુસર વિસ્તારમાં રહેતો નવાઝ મકોડા નામનો આશરે 19 વર્ષનો યુવાન પાણીમાં ગરક થઈ જતાં આસપાસના લતાવાસીઓએ આ અંગે તંત્રને જાણ કરાતા દ્વારકા અને ઓખા વિસ્તારની ફાયર ટીમ ઉપરાંત સ્કુબા ડાઈવિંગ કરતા નિષ્ણાત યુવાન આ સ્થળે દોડી ગયા હતા.
પાણીમાં ગરક થઈ ગયેલા નવાઝની લાંબી શોધખોળ બાદ પાંચેક કલાકની જહેમત પછી રાત્રીના આશરે બારેક વાગ્યે તેનો નિષ્પ્રાણ દેહ સાંપડ્યો હતો. આ બનાવ અંગે સ્થાનિક પોલીસને પણ જાણ કરવામાં આવી છે. આશાસ્પદ એવા યુવાનના અકાળે અવસાનના આ બનાવે પરિવારજનોમાં આક્રંદ સાથે આઘાતની લાગણી પ્રસરાવી છે.
