જામનગરના હાપા વિસ્તારમાં રહેતા ગેરેજ સંચાલક યુવાનનો પત્ની ના વિયોગમાં ગળાફાંસા દ્વારા આપઘાત
- પત્ની રિસાઈને માવતરે ચાલી ગઈ હોવાથી અને પરત આવવા રાજી ન હોવાથી ગળાફાંસો ખાઈ જીવ દીધો
દેશ દેવી ન્યુઝ જામનગર તા ૨૩ ફેબ્રુઆરી ૨૪, હાપા નજીક રંગમતી આવાસ માં રહેતા અને ગેરેજ નું સંચાલન કરતા એક યુવાને પોતાની પત્નીના વિયોગમાં જિંદગીથી કંટાળી જઇ આપઘાત કરી લીધો છે. પત્ની રિસાઈને માવતરે ચાલી ગઈ હોવાથી અને પરત આવતી ન હોવાથી ગળાફાંસા દ્વારા પોતાનું જીવન સમાપ્ત કર્યું છે.
આ બનાવ ની વિગત એવી છે કે જામનગર ના હાપા સ્થિત રંગમતી આવાસ ના બ્લોક નંબર ૭૦૫ માં સાતમા માળે રહેતા સંજય દેવશીભાઈ પરમાર નામના બાવીસ વર્ષના ગેરેજ સંચાલક યુવાને ગઈકાલે પોતાના ઘેર પંખાના હુકમાં ચુંદડી બાંધી ગળાફાંસા દ્વારા આપઘાત કરી લીધો હતો.
આ બનાવ અંગે મૃતક ની બહેન રેખાબેન દેવશીભાઈ પરમાર એ પોલીસને જાણ કરતાં પંચ કોશી એ. ડિવિઝન પોલીસે મૃતદેહ નો કબજો સંભાળી પોસ્ટમોર્ટમ કરાવ્યું છે, અને આ બનાવ અંગે વધુ તપાસ હાથ ધરી છે. પોલીસમાં જાહેર કરાયા અનુસાર મૃતક ની પત્ની છેલ્લા દસેક દિવસથી તેના માવતર રિસાઈને ચાલી ગઈ હતી, જેને અનેક વખત સમજાવવા છતાં પરત આવે તેમ ન હોવાથી મનમાં લાગી આવતાં ગળાફાંસા દ્વારા પોતાની જીવન લીલા સંકેલી લીધી હોવાનું પોલીસમાં જાહેર થયું છે.
