મોટી ખાવડીમાં એક યુવતિ માતાને ઉંઘની ગોળીઓ ખવડાવી પ્રેમી સાથે ભાગી છૂટી…!!!
-
મેઘપર પોલીસે પ્રેમી યુગલ અને પ્રેમીના મિત્રની અટકાયત કરી : માતા સારવાર હેઠળ…
દેશ દેવી ન્યૂઝ જામનગર તા. ૨૯ જુન ૨૪ એવું કહેવામાં આવે છે કે, પ્રેમ આંધળો હોય છે અને આંધળા પ્રેમમાં પાગલ થયેલા પ્રેમીઓને પોતાના પ્રેમ સિવાય બીજું કાંઈ જ દેખાતું નથી હોતુ અને આવા પ્રેમમાં પાગલ બનેલા લોકો પોતાના પરિવાર સાથે પણ દગો કરતા હોય છે, ત્યારે હાલ એવી જ ઘટના જામનગર તાલુકાના મોટી ખાવડી ગામમાંથી સામે આવી છે.
પોલીસ સૂત્રોએ જાહેર કરેલી વિગતો મુજબ મોટી ખાવડીમાં રહેતા અને પાણીપુરીની લારી ચલાવતા છોટેભાઈ મુળુભાઈ કુશ્વાહા (મુળ રહેવાસી ઉત્તર પ્રદેશવાળા) ની ૧૮ વર્ષની દિકરી ને ઉત્તરપ્રદેશના અંભુજ ઉર્ફે બીટુ ગુપ્તા સાથે પ્રેમસંબંધ બંધાયો હતો. પરંતુ અલગ અલગ જ્ઞાતિના હોવાથી પરિવારજનો લગ્ન માટે તૈયાર ન થતાં ગઈકાલે બંનેએ ભાગીને લગ્ન કરવા પ્લાન બનાવ્યો હતો.
તેમના આ પ્લાનમાં પ્રેમી અંભુજે તેના મિત્ર કપ્તાન શાકયે ઉંઘની ગોળીઓનો પાવડર લાવી પ્રેમિકાને આપેલ અને ઉંઘની ગોળીઓનો પાવડર કોલ્ડ્રીંકસમાં ભેળવી યુવતીએ તેની માતાને પીવડાવી ઘરમાં રાખેલ રોકડ રકમ રૂા. ૩.૫૦ લાખ, આધારકાર્ડ વિગેરે લઈ ઘરેથી નિકળી અંભુજ ઉર્ફે બીટુ ગુપ્તા અને કપ્તાન સાકયે પાસે પહોંચી ભાગી જવા કોઈ વાહનની રાહ જોતા હતા.
તે દરમિયાન પેટ્રોલીંગમાં રહેલા મેઘપર પોલીસને શંકા જતાં ત્રણેયની પૂછપરછ કરતાં ભાંડો ફુટ્યો હતો. ત્યાર બાદ પોલીસે ત્રણેયને પોલીસ મથકે લઈ જઈ યુવતીના પિતાને પોલીસ મથકે બોલાવી સમગ્ર બનાવની જાણ કરી હતી. અને બેભાન માતા ઉષાબેનને સારવાર અર્થે જામનગર ખસેડવામાં આવેલ છે.
જ્યારે છોટેભાઈ કુશ્વાહાની ફરિયાદના આધારે પોલીસે યુવતી તેમજ તેના પ્રેમી અંભુજ ગુપ્તા અને તેના મિત્ર કપ્તાન સાકયે વિરૂદ્ધ ઈ.પી. કો કલમ ૧૨૦ બી, ૩૨૮, ૩૮૦, અને ૧૧૪ મુજબ ગુનો નોંધી વધુ તપાસ હાથ ધરી છે.
