ખીજડીયા બાયપાસ નજીક બે ટ્રક વચ્ચે ગોઝારો અકસ્માતમાં બે યુવાનના મોત
જામનગર: જામનગર નજીક ખીજડીયા બાયપાસ પાસે વહેલી સવારે એક અકસ્માતની ઘટનામાં બે યુવકોના ઘટના સ્થળે જ મોત નીપજ્યાનું સામે આવ્યું છે, ખીજડીયા બાયપાસ બે ટ્રક વચ્ચે અકસ્માત થયો હતો.
બન્ને ટ્રક સામ-સામે અથડાઈ જતા આ અકસ્માત સર્જાયાનું સામે આવે છે, ઘટનામાં બે યુવકોના ઘટનાસ્થળ પર જ મોત નીપજ્યા હતા, જાણવા મળતી વિગતો મુજબ મૃતકો નાઘેડી ગામના રહીશ હોવાનું સામે આવ્યું છે.પોલીસે બન્ને મૃતદેહોને પોસ્ટમોર્ટમ અર્થે ખસેડી વધુ કાર્યવાહી હાથ ધરી છે.
મળતી માહિતી મુજબ, ખીજડીયા બાયપાસ પાસે બે ટ્રક વચ્ચે ગમખ્વાર અકસ્માત થયો હતો. ધડાકાભેર બંને ટ્રક સામસામે અથડાતા બાયપાસ મરણચીસોથી ગુંજી ઉઠ્યો હતો.
આ અકસ્માત એટલો ભયાનક હતો કે, બંને ટ્રકના મોરા સામસામે ટકરાતા એકબીજા સાથે જોઈન્ટ થઇ ગયા હતા. આ બનાવમાં બે યુવાનોને માથા સહિતના ભાગે ગંભીર ઈજાઓ પહોંચતા બંનેના ઘટના સ્થળે જ કમકમાટીભર્યા મોત નીપજ્યા હતા.
બનાવની જાણ થતા પંચકોશી એ ડીવીઝન પોલીસ અને ફાયરની ટીમ ઘટના સ્થળે પહોચી હતી.
ફાયરની ટીમે તાત્કાલિક બચાવ કામગીરી હાથ ધરી બંન્ને વાહનોને અલગ કરી બંને મૃતકોને બહાર કાઢ્યા હતા. પોલીસે ટ્રાફિક પૂર્વવત કર્યો હતો. મૃતકોની ઓળખ અને બનાવના કારણ સહિતની વિગતો મેળવવા પોલીસે વધુ તપાસ હાથ ધરી છે.
