જામનગરમાં નાગેશ્વર પાર્ક વિસ્તારમાંથી નવજાત શિશુનો મૃતદેહ મળી આવતાં પોલીસ તંત્ર દોડતું થયું
- કોઈ અજ્ઞાત સ્ત્રીએ પોતાનું પાપ છુપાવવા બાળકને ત્યજી દીધાનું અનુમાન લગાવી માતાની શોધખોળ
દેશ દેવી ન્યૂઝ જામનગર તા ૨ એપ્રિલ ૨૪ જામનગરમાં નાગેશ્વર પાર્ક વિસ્તારમાંથી આજે સવારે એક નવજાત શિશુનો મૃતદેહ મળી આવતાં ભારે ચકચાર જાગી છે. સીટી બી. ડિવિઝન પોલીસે ઘટના સ્થળે દોડી જઈ મૃત શિશુનો કબજો સંભાળ્યો છે, અને બાળકને ત્યજી દેનાર માતાની શોધખોળ હાથ ધરી છે. આ બનાવની વિગત એવી છે કે જામનગરમાં નાગેશ્વર પાર્ક વિસ્તારમાં એક નિર્જન સ્થળે નવજાત શિશુ કપડામાં વીંટળાયેલી અવસ્થામાં પડ્યું હોવાની માહિતી ત્યાંથી પસાર થનાર નાગરીકે પોલીસને આપી હતી.
જેથી સિટી બી. ડિવિઝન નો પોલીસ કાફલો ઘટના સ્થળે દોડી ગયો હતો, અને મૃત બાળકનો કબજો સંભાળી જામનગરની સરકારી જી.જી. હોસ્પિટલમાં પોસ્ટ મોર્ટમ સહિતની કાર્યવાહી હાથ ધરી છે.કોઈ અજ્ઞાત સ્ત્રી દ્વારા પોતાનો ગર્ભ છુપાવવા માટે આ કૃત્ય આચારવામાં આવ્યું હોવાનું અનુમાન લગાવાયું છે, અને બાળકને મૃત હાલતમાં ત્યજી દેનાર માતાની પોલીસ દ્વારા શોધખોળ ચલાવવામાં આવી રહી છે.
