ભાણવડ પાસેથી ભેંસો ભરીને જતો ટ્રક ઝડપાયો
દેશ દેવી ન્યુઝ જામનગર તા.૨ જાન્યુવારી ૨૩ ભાણવડ: ભાણવડના મોટા પુલ પાસે ગત રાત્રિના આશરે 11:30 વાગ્યાના સમયે પસાર થતા જી.જે. 14 ઝેડ 6102 ને ભાણવડ પંથકના રહીશ રણમલભાઈ પરબતભાઈ મોઢવાડિયા (ઉ.વ. 28) નામના યુવાન દ્વારા શંકાના આધારે અટકાવી તેમાં જોતા આ ટ્રકની અંદર બાર ભેંસો દોરડા વડે બાંધીને લઈ જવાતી હોવાનું ધ્યાને આવ્યું હતું.
આથી આ બાબતે સ્થાનિક પોલીસને જાણ કરતા પોલીસ કાફલો આ સ્થળે દોડી ગયો હતો અને ઉપરોક્ત ટ્રકનું નિરીક્ષણ કરતા આ ટ્રકના ચાલક એવા રાજકોટ જિલ્લાના જેતપુર તાલુકાના નવાગઢ ખાતે રહેતા બિલાલ હુસેન કારવા નામના 23 વર્ષના ખાટકી શખ્સ દ્વારા કોઈપણ જાતના આધાર પુરાવા કે સક્ષમ અધિકારીની મંજૂરી વગર ટ્રકમાં ક્રૂરતાપૂર્વક બાર ભેસોને લઈ જવાતી હોવાનું ખુલવા પામ્યું હતું.
આ તમામ ભેસ તેણે ભાણવડ તાલુકાના ઢેબર ગામના રહીશ ભીખુ હાસમ હિંગોરા પાસેથી લીધી હોવાનું જાહેર થયું છે. આ સમગ્ર બનાવ અંગે ભાણવડ પોલીસે રણમલભાઈ પરબતભાઈ મોઢવાડિયાની ફરિયાદ પરથી રૂ. 3 લાખની કિંમતના ટ્રક તથા રૂપિયા 1.20 લાખની કિંમતની 12 ભેંસ હસ્તગત કરી, આરોપી બિલાલ હુસેન કરવાની અટકાયત કરી હતી. જ્યારે અન્ય એક શખ્સ ભીખુ હાસમ હિંગોરા સહિત આ પ્રકરણમાં પોલીસે આઈ.પી.સી. કલમ 114 તથા પશુ સંરક્ષણ ધારાની કલમ મુજબ ગુનો નોંધી, ધોરણસર કાર્યવાહી હાથ ધરી છે.
