જામનગરમાં જોગર્સ પાર્ક પાસેથી સ્કૂટર પર નીકળેલા બે મિત્રોને કારચાલકે ઠોકરે ચડાવતાં ફ્રેકચર સહિતની ઈજા
દેશ દેવી ન્યુઝ જામનગર તા ૨૧ ડિસેમ્બર ૨૩ જામનગરમાં જોગર્સ પાર્ક વિસ્તારમાં પુરપાટ ઝડપે દોડી રહેલી એક કારના ચાલકે સ્કૂટરને હડફેટમાં લઈ લેતાં સ્કૂટર સવાર બે મિત્રોને ફેક્ચર સહિતની નાની મોટી ઈજા થઈ છે. જે મામલે કાર ચાલક સામે પોલીસ ફરિયાદ નોંધાવાઇ છે.આ ફરિયાદ અંગેના બનાવની વિગત એવી છે કે જામનગરમાં નવાગામ ઘેડ બાપુનગર વિસ્તારમાં રહેતો પ્રદિપસિંહ જયેન્દ્રસિંહ જેઠવા નામનો ૩૦ વર્ષનો યુવાન પોતાના મિત્ર નાગરાજસિંહ સાથે એકટીવા સ્કૂટરમાં બેસીને ચા પાણી પીવા માટે જઈ રહ્યા હતા, અને જોગર્સ પાર્ક વિસ્તારમાંથી પસાર થઈ રહ્યા હતા.
જે દરમિયાન પુરપાટ વેગે આવી રહેલી GJ10 DE 9415 નંબરની સ્વીફ્ટ કારના ચાલકે સ્કૂટરને હડફેટમાં લઈ લેતાં બંને મિત્રોને ફ્રેક્ચર સહિતની નાની મોટી ઈજા થઈ હોવાથી જામનગરની જી.જી. હોસ્પિટલમાં સારવાર અપાઇ છે.આ અકસ્માતના બનાવ અંગે કારના ચાલક સામે IPC – કલમ-૨૭૯, ૩૩૭, ૩૩૮ તથા એમ.વી.એકટ કલમ-૧૭૭, ૧૮૪ તથા ૧૩૪ મુજબ ફરિયાદ નોંધાવતાં પોલીસે કારના નંબરના આધારે તેના ચાલકની શોધખોળ હાથ ધરી છે.
