ભાવનગરમાં યુવાન પર હુમલો થતા ગુપ્ત ભાગે ગંભીર ઇજા થતા બનાવ હત્યામાં પલટાયો.
દેશદેવી ન્યુઝ નેટવર્ક-ભાવનગર
ભાવનગરમાં યુવાનની ગુપ્ત ભાગે હુમલો કરી હત્યા કરી નાખ્યાનો બનાવ બનવા પામ્યો છે.
ખુનનાં આ બનાવની વિગતો એવી છે કે વરતેજમાં શિવરજંની સોસાયટીમાં રહેતો અને છેલ્લા કેટલાક સમયથી મુંબઇમાં કોઇ ગામમાં રહી માટી કામ કરતાં હસમુખભાઇ બાબુભાઇ ડુંગરાળીયા ઉ.3પ ગઇ તા. 7 મીનાં રોજ કોઇ સબંધીને ત્યાં લૌકીક કામે વતન ભાવનગર – વરતેજમાં આવ્યો હતો.
હસમુખભાઇ વરતેજ બસ સ્ટેન્ડ નજીક ઉભો હતો ત્યારે કોઇ અજાણ્યા શખ્સોએ તેનાં ગુપ્ત ભાગે તેમજ બન્ને સાથળનાં ભાગે ગંભીર ઇજાઓ પહોંચાડી નાસી છૂટયા હતાં.
ઇજાગ્રસ્ત હસમુખભાઇને બેભાન હાલતે અત્રેની સર ટી-હોસ્પીટલમાં ખસેડાયેલ જયાં તેનું મોત નિપજતાં બનાવ ખુનમાં પરીણમ્યો છે.
આ બનાવ અંગે મૃતક યુવાનનાં પિતા બાબુભાઇ લવજીભાઇ ડુંગરાળીયાએ વરતેજ પોલીસ સ્ટેશનમાં અજાણ્યા શખ્સો વિરૂધ્ધ ફરીયાદ નોંધાવતા પોલીસે ગુન્હો નોંધી આરોપીને ઝડપી લેવા તજવીજ હાથ ધરી છે.
આ બનાવની તપાસ વરતેજ પોલીસ સ્ટેશનના પો.સ.ઇ. એચ. એ. જાડેજા ચલાવી રહ્યા છે.
