કલ્યાણપુર તાલુકાના ગાંઘવી ગામે નજીવી બાબતે મુસ્લિમ યુવાનની ઘાતકી હત્યા
લાકડાના ધોકા વડે ઢીમ ઢાળી દેનાર શખ્સ સામે ગુનો નોંધાયો: હોડીને ધકકો મારવા બાબતે ઝઘડો
દેશ દેવી ન્યુઝ ખંભાળિયા ૧૬.: ક્લ્યાણપુર તાલુકાના ગાંઘવી ગામે આવેલા હર્ષદના દરિયા કિનારા વિસ્તારમાં રહેતા અસગરભાઇ અબ્બાસભાઇ પટેલીયા નામના 30 વર્ષના યુવાન તથા તેમના ભાઇ સદામભાઇ અબ્બાસભાઇ પટેલીયાને આ જ વિસ્તારમાં રહેતા અસગર જુસબ પટેલીયા નામના શખ્સે હોડીને ધકકો મારવાનું કહેતાં બંને ભાઇઓએ ના પાડી દીધી હતી.
આ અંગેનો ખાર રાખી આરોપી અસગર જુસબ પટેલીયાએ ઉંશ્કેરાઇને તેના હાથમાં રહેલો લાકડાનો ધોકો સદામભાઇ અબ્બાસભાઇ પટેલીયાને ઝીંકી દેતા તેમને નાની મોટી ઇજાઓ થવા પામી હતી.
પોતાના ભાઇને પડી રહેલ મારથી બચાવવા જતા તેના ભાઇ અસગરભાઇ અબ્બાસભાઇ પટેલીયા વચ્ચે પડતા આરોપી અસગર જુસબે તેને પણ લાકડું મારી દીધું હતું.
લાકડાનો આ ઘા અસગર અબ્બાસભાઇ માટે જીવલેણ સાબિત થતાં તેમને ગંભીર ઇજાઓ થવા પામી હતી. જેના કારણે તેમનું મૃત્યુ નિપજયું હતું. આ સમગ્ર બનાવ અંગે મૃતકના ભાઇ સદામ અબ્બાસભાઇ (ઉં.વ.30) ની ફરીયાદ પરથી કલ્યાણપુર પોલીસે અસગર જુસબ પટેલીયા સામે હત્યાની કલમ આઇ. પી. સી. 302, 323, 504 તથા જી. પી. એકટની કલમ મુજબ ગુનો નોંધી આગળની તપાસ કલ્યાણપુરના પી. એસ. આઇ. એફ. બી. ગગનીયા દ્વારા હાથ ધરવામાં આવી છે.
