ડ્રગ્સ પ્રકરણમાં તપાસનો ધમધમાટ: સચાણામાં એટીએસના ધામા-સર્ચ ઓપરેશન
દેશ દેવી ન્યુઝ નેટવર્ક જામનગર ૦૧.: જામનગર જિલ્લાના સચાણામાં આજે સવારથી એટીએસ ટીમોએ ધામા નાખ્યા છે અને ડ્રગ્સ પ્રકરણમાં જુદા જુદા વિસ્તારોમાં સર્ચ ઓપરેશન હાથ ધરવામાં આવ્યુ હોવાનું સૂત્રોમાંથી જાણવા મળ્યુ છે.
પ્રાપ્ત માહિતી મુજબ મોરબી, કચ્છ, જામનગર, દેવભૂમિ દ્વારકા જિલ્લામાં છેલ્લા થોડા દિવસોમાં વ્યાપક પ્રમાણમાં ડ્રગ્સનો જથ્થો ઝડપાયો હતો..
ત્યાર બાદ એટીએસ અને જુદી જુદી પોલીસ ટીમો દ્વારા તપાસનો ધમધમાટ શરૂ કરવામાં આવ્યો હતો અને આ પ્રકરણમાં અનેક આરોપીઓને ઝડપી લેવામાં આવ્યા હતા. આ દરમિયાન મોટા ડ્રગ્સ પ્રકરણનો પર્દાફાશ થયો હતો.
આજે સવારથી જામનગર જિલ્લાના સચાણામાં એટીએસની ટીમે ખાનગીરાહે તપાસ હાથ ધરી છે અને ડ્રગ્સ પ્રકરણમાં સંડોવાયેલા આરોપીઓ સાથે સચાણાના કોઈ શખ્સોની સંડોવણી છે કે નહિ ? તે દિશામાં તપાસ હાથ ધરવામાં આવી છે.
સચાણાના જુદા જુદા વિસ્તારોમાં એટીએસની ટીમ અને પોલીસે સર્ચ ઓપરેશન હાથ ધર્યુ છે આ દરમિયાન કોઈની સંડોવણી ખુલે છે કે નહિ ? તે દિશામાં તપાસ હાથ ધરવામાં આવશે.
