ધ્રોલના ખેંગારકામાં વીજ કર્મચારીનો કાંઠલો પકડી ધાક-ધમકી આપી ફરજમાં રૂકાવટ કર્યાની બે શખસ સામે ફરિયાદ
જામનગર: ધ્રોલમાં ગોકુલ પાર્ક વિસ્તારમાં રહેતા અને ધ્રોલ પીજીવીસીએલની કચેરીમાં આસી.લાઇનમેન તરીકે ફરજ બજાવતાં વિશાલભાઈ મનુભાઇ રાઠોડ નામના કર્મચારીએ ધ્રોલ પોલીસ મથકમાં પોતાને ગાળો ભાંડી કાંઠલો પકડી જાનથી મારી નાખવાની ધમકી આપવા અંગે અને ફરજમાં રૂકાવટ કરવા અંગે ખેંગારકા ગામના હરપાલસિંહ ઉર્ફે હપો જાડેજા અને તેના એક સાગરિત સામે ફરિયાદ નોંધાવી છે.
જે પોલીસ ફરિયાદમાં જાહેર કરાયા અનુસાર લાઈનમેન વિશાલભાઈ ગઈકાલે ખેંગારકા ગામ પાસે આવેલા 66 કે.વી. સબ સ્ટેશન માં વીજ લાઈન ની સમારકામની કામગીરી કરી રહ્યા હતા.જે દરમિયાન બન્ને આરોપીઓ ત્યાં ધસી આવ્યા હતા, અને ઉશ્કેરાઇ જઇ ખેંગારકા ગામ ની લાઈટો વારંવાર કેમ બંધ થઈ જાય છે, તેમ કહી જીભાજોડી કરી કાંઠલો પકડી લીધા પછી ધાક ધમકી આપી હતી.
પોલીસે સમગ્ર મામલે ફરજમાં રૂકાવટ અને ધાક-ધમકી અંગેની કલમ હેઠળ ગુનો નોંધ્યો છે, અને બંને આરોપીઓની શોધખોળ હાથ ધરી છે.
