જામનગર ની સરકારી જી.જી. હોસ્પિટલમાં હથિયાર ધારી સુરક્ષા ગાર્ડની નિમણૂક કરવા જુનીયર ડોકટરો ની માંગ
દેશ દેવી ન્યૂઝ જામનગર તા. ૧પ જૂન ૨૪ , જામનગર ની સરકારી ગુરૂ ગોવિંદસિંઘ હોસ્પિટલ માં શસ્ત્રધારી સુરક્ષા કર્મચારી ની સેવા ઉપલબ્ધ કરવા માટે ની માંગણી સાથે મેડિકલ કોલેજ માં ડીન ને જુનિયર ડોક્ટર એસોસિએશન દ્વારા આવેદનપત્ર પાઠવાયું છે.
જુનિયર ડોકટર્સ એસો.ના ડો. કિશોર દધેથરીયા, વાઈસ પ્રેસીડેન્ટ ડો. કૃષ્ણા પટેલ અને ઉર્વિક પોકીયા સહિતનાઓ ની આગેવાનીમાં જેડીએ ના સભ્યો એ આવેદનપત્રમાં એવી રજુઆત કરી હતી કે તાજેતરમાં હોસ્પિટલની અંદર ટ્રોમા વોર્ડ પાસે એક યુવાનની હત્યા નિપજાવાઈ હતી. ખાસ કરીને ટ્રોમા સેન્ટર, આઈસીયુ, એસઆઈસીયુ, મેડિકલ ઈમરજન્સી વોર્ડ સહિતના કેટલાક ચોક્કસ વોર્ડમાં તબીબોની સુરક્ષાને ધ્યાનમાં રાખીને હથિયાર ધારી સુરક્ષા ગાર્ડ રાખવા જોઈએ જેથી આવા બનાવો બનતા અટકાવી શકાય.
