જામનગર શહેરના કેટલાક વિસ્તારોમાં આજે ગેસ ની પાઈપ લાઈનમાં ગેસનો સપ્લાય બંધ થતાં દેકારો
દેશ દેવી ન્યૂઝ જામનગર તા ૧૨ એપ્રિલ ૨૪ જામનગર શહેર માં આજે કેટલાક વિસ્તારોમાં પાઈપલાઈન મારફત સપ્લાય કરવામાં આવતા રાંધણ ગેસની અચાનક બંધ થઈ જતાં મહિલાઓ પરેશાનીમાં મુકાઈ ગઇ હતી. અને ભારે દીકરો બોલી ગયો હતો . જોકે બપોર બાદ ફરીથી ગેસ પુરવઠો શરૂ થઈ જતાં હાશકારો અનુભવાયો છે.
આ અંગે જાણવા મળતી વિગતો પ્રમાણે લીમડા લેન, સરૂ સેકશન રોડ, લાલવાડી વિસ્તાર વગેરે વિસ્તારોમાં બપોરે ૧ર વાગ્યા આસપાસના સમયે જે લોકો ગુજરાત ગેસ દ્વારા પાઈપલાઈન મારફતે રાંધણ ગેસનું જોડાણ ધરાવે છે, તેમના ઘરે ગેસ સપ્લાય બંધ થઈ ગઈ હતી. રસોઈના કામકાજ સમયે જ બપોરે રાંધણગેસની સપ્લાય બંધ થઈ જવાથી ખાસ કરીને ગૃહિણીઓ મુસીબતમાં મુકાઈ ગઈ હતી. અને બપોર દરમિયાન ભારે દેકારો બોલી ગયો હતો.
જામનગરમાં આમ કોઈપણ જાતની આગોતરી જાણ કર્યા વગર અચાનક ગેસ સપ્લાય બંધ થઈ જવાથી અનેક લોકો મૂંઝવણ માં મુકાયા હતા. જામનગરમાં કંપનીની સ્થાનિક ઓફિસ અને જવાબદારોને ફોન કરવા છતાં કોઈ સંતોષકારક જવાબ મળ્યા ન હતાં.જો કે એક અધિકારીએ અંતે જણાવ્યું હતું કે સાત રસ્તા પાસે ગેસની પાઈપલાઈનમાં મરામતનું કામકાજ ચાલુ હોવાથી પુરવઠો બંધ કરી દેવાયો હતો, અને રીપેરીંગ કામ પૂર્ણ થયે બપોર બાદ સપ્લાય ચાલુ કરી દેવાયો હોવાથી હાશકારો અનુભવાયો છે.
