જામનગરના કોંગી કોર્પોરેટર અને પૂર્વ વીપક્ષી નેતા ની પોલીસ દ્વારા પાંચ માસ પહેલાંના હત્યા પ્રયાસ કેસમાં ધરપકડ કરી જેલ હવાલે કરાયા
દેશ દેવી ન્યુઝ જામનગર તા ૨૧ ફેબ્રુઆરી ૨૪, જામનગર મહાનગરપાલિકાના વિપક્ષી નેતા અને કોંગી કોર્પોરેટરની ગઈ રાત્રે પોલીસ દ્વારા હત્યા પ્રયાસ અંગેના પાંચ માસ જુના કેસમાં ધરપકડ કરવામાં આવી હતી, અને અદાલત સમક્ષ રજુ કરાયા પછી તેને જેલમાં ધકેલી દેવા હુકમ થયો છે. જામનગર મહાનગરપાલિકાના પૂર્વ વિપક્ષી નેતા અને વોર્ડ નંબર ૧૨ના કોંગી કોર્પોરેટર અસલમ ખીલજી કે જેની સામે આજથી પાંચ માસ પહેલાં સીટી એ. ડિવિઝન પોલીસ મથકમાં એક યુવાનની હત્યા નો પ્રયાસ કરવા અંગેનો ગુનો નોંધવામાં આવ્યો હતો, અને તે ગુનામાં છેલ્લા પાંચ વર્ષથી નાસ્તા ફરતા રહ્યા હતા. જામનગરના કાલાવડ નાકા બહાર રહેતા અબુ સૂફીયાન નામના યુવાન સાથે જુના ચૂંટણીના મન દુઃખ અંગે તકરાર ચાલતી હતી, અને મારામારીના કેસમાં જામીન પર છૂટ્યા પછી તુરત જ અસલમ ખીલજીના કહેવાથી તેના અન્ય ચાર સાગરીતો દ્વારા તેનું આપહરણ કરાયું હતું, અને જીવલેણ હુમલો કરી હત્યાનો પ્રયાસ કરવામાં આવ્યો હતો.
જે અંગે સીટી એ. ડિવિઝન પોલીસ મથકમાં ગુનો દાખલ કરાયા પછી આટલા સમયથી કોર્પોરેટર અસલમ ખીલજી નાસતા ફરતા રહ્યા હતા. દરમિયાન ગઈકાલે તેઓ જામનગરમાં આવ્યા હોવાની બાતમી મળતાં જિલ્લા પોલીસ વડા પ્રેમસુખ ડેલૂની સૂચનાથી સીટી એ. ડિવિઝનના પી.આઇ. એન.એ. ચાવડા અને તેમની ટીમે અસલમ ખીલજીની ધરપકડ કરી લેવામાં આવી હતી, અને આજે અદાલત સમક્ષ રજૂ કરાતાં તેને જેલમાં ધકેલી દેવા હુકમ થયો છે.
