હાલારના બન્ને જિલ્લામાંથી આસ્થા સ્પે.ટ્રેન મારફતે ૧૪૫૦ રામભક્તો અયોધ્યામાં રામ લલ્લા ના દર્શનાર્થે રવાના થયા
દેશ દેવી ન્યુઝ જામનગર તા. ૨૧ ફેબ્રુઆરી ૨૪, રામ ભક્તો નો પ્રવાહ અયોધ્યા તરફ વળ્યો છે.હાલારના બન્ને જિલ્લામાંથી ૧૪૫૦ થી વધુ રામ ભકતો આજે ખાસ ટ્રેન મારફત અયોધ્યા જવા રવાના થયા હતા.જેમાં સાંસદ પણ દ્વારકા થી જામનગર સુધી ટ્રેનમાં જોડાયા હતા. બંને જિલ્લાના રામભકતો અયોધ્યા જવા માટે આજે રવાના થયા, ત્યારે જામનગરના રેલ્વે સ્ટેશન પર ઉપસ્થિત રહેલા ભાજપ નાં આગેવાનો એ વિદાય આપી હતી.
ભગવાન શ્રીરામના જન્મ સ્થળ અયોધ્યામાં મંદિરમાં મૂર્તિ પ્રાણપ્રતિષ્ઠા પછી મંદિર લોકોના દર્શન માટે ખુલ્લુ મૂકવામાં આવતા ભકતોનો પ્રવાહ અયોધ્યા તરફ જઈ રહ્યો છે.આજે દ્વારકાથી લગભગ ૪૦૦ યાત્રિકો ખાસ ટ્રેન માર્ગે રવાના થયા છે. આ ટ્રેન બપોરે જામનગર આવી પહોંચી હતી. ત્યારે લગભગ જામનગર જિલ્લાના ૧૦૫૦ જેટલા રામભકતો જામનગર થી આ ટ્રેનમાં સાથે જોડાયા હતા. અને અયોધ્યા જવા રવાના થયા હતાં.
જામનગર અને દેવભૂમિ દ્વારકા જિલ્લા ના સાંસદ પૂનમબેન માડમ પણ દ્વારકા થી જ રામભક્તો સાથે ટ્રેનમાં જોડાયા હતા અને દ્વારકા થી જામનગર સુધી મુસાફરી કરી હતી. આજે બપોરે આ ટ્રેન જામનગરના રેલ્વે સ્ટેશન આવી પહોંચતા આ સમયે જિલ્લા ભાજપ પ્રમુખ રમેશભાઈ મુંગરા , શહેર ભાજપ પ્રમુખ વિમલભાઈ કગથરા , ભાજપના કોર્પોરેટરો, આગેવાનો સહિત બહોળી સંખ્યામાં કાર્યકર્તાઓ એ રામ ભક્તોને વિદાય આપી હતી.
