જામનગરમાં ખોડિયાર કોલોની વિસ્તારમાં પગપાળા ચાલીને જઈ રહેલી કોલેજીયન યુવતીના હાથમાંથી મોબાઈલ ઝુંટવીને બે ગઠિયાઓ ફરાર થયા
દેશ દેવી ન્યુઝ જામનગર તા ૨ જાન્યુઆરી ૨૪, જામનગરમાં ખોડીયાર કોલોની વિસ્તારમાંથી એક કોલેજીયન યૂવતી ના હાથમાંથી મોબાઈલ ફોન ની ચીલ ઝડપ કરીને ડબલ સવારી બાઈકમાં બે ગઠીયાઓ ભાગી છૂટયા હતા. જેને પોલીસ શોધી રહી છે.
આ બનાવની વિગત એવી છે કે જામનગરમાં કોમલ નગર શેરી નંબર -૨ માં રહેતી અંકિતાબેન અશોકભાઈ ચોપડા નામની કોલેજીયન યુવતી ૩૧ ની ડિસેમ્બરના સાંજે સાડા ચારેક વાગ્યાના અરસામાં ખોડીયાર કોલોની વિસ્તારમાં ૮૦ ફૂટના રોડ પર ત્રયમ્બકેશ્વર મહાદેવના મંદિર પાસેથી પગપાળા ચાલીને જઈ રહી હતી, જે દરમિયાન ડબલ સવારી બાઈકમાં આવેલા બે ગઠીયાઓ તેમના હાથમાંથી મોબાઇલ ફોન ઝુંટવીને ભાગી છુટ્યા હતા.
તેણીએ બુમાબુમ કરી હતી, પરંતુ બંને ગઠીયાઓ ભાગી છૂટવામાં સફળ થયા હતા. જેથી સમગ્ર મામલો સીટી સી. ડિવિઝન પોલીસ મથકમાં લઈ જવાયો હતો, અને પોલીસે સીસીટીવી કેમેરાઓની મદદથી બંને ગઠિયાઓ વિરૂદ્ધ ઇ.પી.કો કલમ ૩૭૯(એ),૧૧૪ મુજબ ગુનો નોંધી શોધખોળ શરૂ કરી છે
