દ્વારકા પોલીસની બોલેરો કાર હંકારી જનાર તસ્કરને આખરે જામનગરથી દબોચી લેવાયો
દેવી ન્યુઝ જામનગર તા ૨૮ ડીસેમ્બર ૨૩, દેવભૂમિ દ્વારકા ખાતે આજે સવારે પોલીસની એક બોલેરો કારની ઉઠાંતરી થઈ હતી, જે બોલેરો ચોરી કરીને ભાગી રહેલા ગાંધીધામના શખ્સને પોલીસે જામનગર ખાતેથી દબોચી લીધો હતો.દ્વારકાના પોલીસ બેડામાં ભારે ચારચાર જગાવનારા પોલીસના વાહનની ચોરીના આ બનાવની વિગત મુજબ દ્વારકા પોલીસ મથકની જી.જે. ૧૮ જી.બી. ૭૨૬૯ નંબરની સરકારી બોલેરો જીપ પોલીસ મથકના કમ્પાઉન્ડમાં રાખવામાં આવી હતી, જે સવારે આશરે ૮.૧૫ વાગ્યાના સમયે કોઈ શખ્સ ચોરી કરીને લઈ ગયો હોવાનું ખુલવા પામ્યું હતું.
આ ગંભીર બાબતે પોલીસે તાકીદની કાર્યવાહી કરી, દેવભૂમિ દ્વારકા જિલ્લા એલ.સી.બી. તથા એસ.ઓ.જી. પોલીસ દ્વારા સઘન કામગીરી હાથ ધરી હતી. આ બોલેરો વાહન સૌપ્રથમ તો દ્વારકા નજીકના કુરંગા અને ત્યારબાદ ખંભાળિયાના ટોલનાકા પાસેથી પસાર થઈ અને જામનગર તરફ ગયું હોવા અંગેના સીસીટીવી ફૂટેજ પોલીસને હાથ લાગ્યા હતા. જેથી દેવભૂમિ દ્વારકા જિલ્લા પોલીસ વડા નિતિશ પાંડેયની સુચના મુજબ આ બાબતે જામનગર જિલ્લા પોલીસને જાણ કરવામાં આવી હતી. જેથી જામનગર એલ.સી.બી. પોલીસ તથા દેવભૂમિ દ્વારકા જિલ્લા એસ.ઓ.જી. પોલીસ દ્વારા જામનગરમાં આવેલી અંબર ચોકડી પાસેથી આ બોલેરો જીપને ઝડપી પાડવામાં આવી હતી.
આ બોલેરોમાં એક જ શખ્સ હતો. જેનો ચાલક મોહિત અશોકભાઈ શર્મા કે જે ગાંધીધામનો વતની હોવાનું ખુલવા પામ્યું છે. જે અંગે પોલીસે જરૂરી નોંધ કરી વિવિધ દિશામાં તપાસ હાથ ધરી છે. અને બોલેરો ની સાથે આરોપીને પરત દ્વારકા લઈ જવામાં આવ્યો છે.
