હાપા નજીક કારે હડફેટે લેતા રાહદારીનું મોત, એક ઘાયલ
દેશ દેવી ન્યુઝ જામનગર તા.૧૧ ફેબ્રુઆરી ૨૩ : જામનગર રાજકોટ ધોરી માર્ગ પર હાપા નજીક પુરપાટ વેગે દોડી રહેલી એક કારના ચાલકે રસ્તો ઓળંગી રહેલા એક યુવાનને હડફેટમાં લઈ કચડી નાખતાં સ્થળ પર જ કરુણ મૃત્યુ નીપજ્યું છે, જયારે કારમાં બેઠેલી એક વ્યક્તિ પણ ઘાયલ થઇ છે.
આ અકસ્માતના બનાવની વિગત એવી છે કે જામનગર નજીક હાપા ખારી વિસ્તારમાં રહેતો સોમાભાઈ ભુદરભાઈ નામનો 25 વર્ષનો કોળી પટેલ જ્ઞાતિનો યુવાન ગઈકાલે રાત્રિના 11.00 વાગ્યાના અરસામાં જામનગર- રાજકોટ ધોરી માર્ગ પર હાપા નજીક રસ્તો ઓળંગી રહ્યો હતો, જે દરમિયાન જામનગર તરફથી પુરપાટ વેગે આવી રહેલી જી.જે.10 બી.જી. 7060 નંબરની કારના ચાલકે તેને અડફેટમાં લઈ લેતાં ગંભીર ઇજા થવાના કારણે તેનું ઘટના સ્થળે જ કમ કમાટી ભર્યું મૃત્યુ નીપજ્યું હતું.
આ અકસ્માતમાં કારની અંદર બેઠેલી એક વ્યક્તિ પણ ઇજાગ્રસ્ત બની હતી, જેને સારવાર માટે જામનગરની જી.જી. હોસ્પિટલમાં ખસેડવામાં આવી હતી. આ અકસ્માતના બનાવની જાણ થતાં પંચકોશી બી. ડિવિઝનનો પોલીસ કાફલો ઘટના સ્થળે દોડી ગયો હતો, અને કારના ચાલક સામે ગુનો નોંધી કાર કબજે કરી છે, જ્યારે મૃતદેહનો કબજો સંભાળી પોસ્ટ મોર્ટમ સહિતની કાર્યવાહી હાથ ધરી છે.
