જામનગરના ત્રણેય ડીવીઝનમાંથી ઝડપાયેલ એક કરોડથી વધુની કિંમતની દારૂની બોટલો ઉપર ફરી વળ્યું સરકારી બુલડોઝર
દેશ દેવી ન્યુઝ જામનગર: તા ૦૨ ફેબ્રુઆરી ૨૩ જામનગર શહેરના ત્રણેય પોલીસ ડિવિઝન તેમજ રેલવે પોલીસ દ્વારા કબજે કરાયેલા 1 કરોડ 33 લાખ ની કિંમતના ઈંગ્લીશ દારૂના જથ્થા પર આજે બુલડોઝર ફેરવી દેવાયું હતું. શહેરના પ્રાંત અધિકારી તથા અન્ય પોલીસ અધિકારી અને નશાબંધી શાખાના અધિકારીઓની હાજરીમાં જામનગરની ભાગોળે નાઘેડી નજીક ઓપરેશન પાર પાડવામાં આવ્યું હતું, અને દારૂના જથ્થાનો સંપૂર્ણપણે નાશ કરી દેવાયો છે.
જામનગરના સીટી એ. ડિવિઝન પોલીસ સ્ટેશન હેઠળના વિસ્તારમાં થી 9547 નંગ ઇંગ્લિશ દારૂની બાટલીનો જથ્થો કે જેની કિંમત 41 લાખ 22 હજાર 900 રૂપિયા થાય છે, આ ઉપરાંત સીટી બી. ડિવિઝન પોલીસ સ્ટેશન હેઠળના વિસ્તારમાંથી પકડાયલો 13162 નંગ દારૂની બાટલીનો જથ્થો કે જેની કિંમત 64,99,200 થાય છે. ઉપરાંત સીટી સી. ડિવિઝન પોલીસ સ્ટેશન હેઠળ પકડાયેલો 13181 દારૂની બાટલીનો જથ્થો કે જેની કિંમત 34,54,600 થાય છે જેનો જામનગર ખંભાળિયા ધોરી માર્ગ પર નાગેડી નજીક સરકારી ખરાબાની જગ્યામાં બુલડોઝર ફેરવી દેવાયું હતું.
જેમાં જામનગર શહેર વિભાગના પ્રાંત અધિકારી ડી ડી શાહ, ઉપરાંત જામનગર શહેર વિભાગના ડીવાયએસપી વરૂણ વસાવા, અને ત્રણેય પોલીસ ડિવિઝન ના પોલીસ અધિકારીઓ તથા નશાબંધી શાખાના અધિકારીઓ વગેરે હાજર રહ્યા હતા. જેઓની હાજરીમાં બુલડોઝર ફેરવી દઈ તમામ જથ્થાનો નાશ કરવામાં આવ્યો હતો.
