જામનગરમાં નજીવી બાબતે પાડોશીઓમાં બબાલ
- વૃદ્ધ દંપતી અને પુત્ર સહિત ત્રણ ઉપર તલવાર- છરી વડે હુમલો: મહિલા સહિતના ચાર પાડોશીઓ સામે ફરિયાદ
દેશ દેવી ન્યુઝ જામનગર તા.૨૬ ડિસેમ્બર ૨૨ જામનગરના નવાગામ ઘેડ આનંદ સોસાયટી વિસ્તારમાં રહેતા એક વૃદ્ધ દંપત્તિ અને તેના પુત્ર પર ઝાડના પાંદડા ખરવાના પ્રશ્ને તલવાર અને છડી વડે હુમલો કરવા અંગે એક મહિલા સહિતના ચાર પાડોશીઓ સામે ફરિયાદ નોંધાવાઈ છે, જ્યારે ત્રણેયને જામનગરની જી.જી. હોસ્પિટલમાં સાવાર અપાઈ છે.
આ હુમલાના બનાવની વિગત એવી છે કે જામનગરમાં નવાગામ ઘેડ આનંદ સોસાયટીમાં રહેતા અને ખેતી કામ કરતા સાદિકભાઈ કાસમભાઈ ખફી નામના 62 વર્ષના બુઝુર્ગે પોતાના ઉપર તેમજ પોતાના પત્ની તેમજ પુત્ર સહેજાદ ઉપર છરી અને તલવાર વડે હુમલો કરી ઇજા પહોંચાડવા અંગે પાડોશમાં જ રહેતા યોગેશ બારોટ, કલ્પેશ બારોટ, દિપૂ બારોટ અને યોગેશ બારોટ ની પત્ની વગેરે સામે ફરિયાદ નોંધાવી છે.
પોલીસ ફરિયાદમાં જાહેર કરાયા અનુસાર સાદીકભાઈ ના ઘરમાં બદામનું ઝાડ છે, જે ઝાડના પાંદડા બાજુમાં રહેતા યોગેશ બારોટ ના ઘરમાં પડતા હોવાથી પાડોશીઓએ આવીને તકરાર કરી હતી. જેમાં સાદિકભાઈએ કહ્યું કે ઝાડ છે, જેથી તેના પાંદડા તો ખરતા રહેશે.
જેને લઈને પાડોશીઓ ઉશ્કેરાયા હતા અને તલવાર અને છરી જેવા હથિયાર સાથે ધસી આવી હુમલો કરતાં ત્રણેયને જામનગરની જી.જી. હોસ્પિટલમાં ખસેડવામાં આવ્યા હતા, અને તેઓને ટાંકા લેવા પડ્યા છે. સીટી બી. ડિવિઝન પોલીસે ચારેય હુમલાખોરો સામે ગુનો નોંધી તેઓની શોધખોળ હાથ ધરી છે.
