ધ્રોલ નજીક ટ્રેકટરને ટેન્કરે હડફેટે લેતા બેના મોત.
દેશ દેવી ન્યુઝ નેટવર્ક ધ્રોલ તા. 3
ધ્રોલના ત્રીકોણ બાગ પાસે આજે વહેલી સવારે 4.30 વાગ્યે ધ્રોલ તરફ આવી રહેલા ટ્રેકટરને પાછળથી પુરપાટ આવી રહેલા ટેન્કરે ઠોકર મારતા ટ્રેકટરમાં બેઠેલા બે વ્યકિતઓ નીચે પછડાઇ ગયેલ અને તેના ઉપર ટ્રેકટરનું મોટુ વીલ ફરી વળતા બંનેનું ઘટનાસ્થળે જ મૃત્યુ નીપજેલ. તાલુકાના દેડકદડ ગામના ખેડૂત ભૂપતભાઇ લાભાભાઇ કાદરીયા (ઉ.વ.45) તથા મયુર મગનભાઇ જીતુભાઇ બાધેડ (ઉ.વ.31)નું ઘટના સ્થળે જ મૃત્યુ નીપજેલ. તેમજ આ ટ્રેકટરને ઠોકર લાગતા ટ્રેકટર ચાલુ એ ચાલુ ત્રીકોણ બાગથી 400 મીટર જેટલા અંતરે મામલતદાર કેચરી સુધી પહોંચી ગયેલ અને ત્યાં બાજુની ફૂટપાથ ઉપર ચડી જતા ત્યાં અટકાયેલ.
આ અકસ્માતમાં ટેન્કરના યુ.પી.21 સી.એન. 1265 તથા ટ્રેકટર નં. જી.આર.આઇ. 9606 માં ખેડૂત તેના ચણા ભરીને ધ્રોલ માર્કેટ યાર્ડમાં વેચવા માટે આવી રહેલ હતો. પરંતુ કમનસીબે અકસ્માતમાં ખેડુત તથા તેના મજુરના મૃત્યુ નિપજયા. આ મજુરી કામ કરતા મગનભાઇ જીતુભાઇ બાધેડ પાંચ સંતાનોના પિતા હતા. જે પાંચ બાળકો નોધારા થયેલ છે.
આ ગંભીર અકસ્માત સર્જનાર ટેન્કર ચાલક ટેન્કર મુકીને નાસી ગયેલ હોવાનું જાણવા મળેલ છે. આ બનાવની વધુ તપાસ ધ્રોલ પોલીસ ચલાવી રહેલ છે.
