દેવભૂમિ દ્વારકાના દેવળિયામાં અંગ્રેજી શરાબનો જથ્થો ઝડપાય, પણ આરોપી ફરાર!
દ્વારકા: કલ્યાણપુર તાલુકાના દેવળીયા ગામે સ્થાનિક પોલીસે વિદેશી દારૂ અંગે એક આસામીના પડતર મકાનમાં દરોડો પાડી આ સ્થળેથી 38 બોટલ વિદેશી દારૂ તથા 61 બીયરના ટીન મળી કુલ રૂપિયા 21,300 નો મુદ્દામાલ કબજે કર્યો હતો.
આ દારૂનો જથ્થો આ જ ગામના વેજા રામદે માડમ નામના શખ્સ દ્વારા રાખવામાં આવ્યું હોવાનું પોલીસમાં જાહેર થયું છે.
પરંતુ આ સ્થળે વેજા માડમ પોલીસને હાથ લાગ્યો ન હતો. જેથી પોલીસે પ્રોહીબીશન એક્ટ મુજબ ગુનો નોંધી આગળની તપાસ હાથ ધરી છે.
આ ઉપરાંત અન્ય એક દરોડામાં મીઠાપુરના આરંભડા વિસ્તારમાં હાઈવે માર્ગ પરથી પસાર થતી જી.જે. 06 જે.ઈ. 4644 નંબર ફોર્ડ ફીગો મોટરકારને પોલીસે અટકાવી ચેકિંગ કરતા આ કારની ડેકીમાં એક બાચકામાં છુપાવીને લઈ જવાતા એકસો લીટર દેશીદારૂનો જથ્થો મળી આવ્યો હતો.
આથી પોલીસે રૂપિયા બે લાખની કિંમતની મોટરકાર તથા બે હજારની કિંમતના દારૂ સાથે ઓખાના રહીશ રાજેશ હરીશભાઇ રામપરીયા (ઉ.વ. 24) નામના શખ્સની અટકાયત કરી પ્રોહીબીશન એક્ટ મુજબ જરૂરી કાર્યવાહી કરી હતી.
