જામનગરના બેડીમાં રીક્ષા પાર્ક કરવા મામલે યુવાન પર હુમલો : ચાર સામે ફરિયાદ
જામનગર: જામનગરના બેડી, ચાંદની ચોક, સંધી ફળિયામાં રહેતાં અકરમ હસનભાઈ સમા (ઉ.વ.20) એ બેડી મરીન પોલીસમાં બેડીમાં રહેતાં અબ્બાસ દાઉદ મોખા, અકબર અબ્બાસ મોખા, અહેમદ અબ્બાસ મોખા, અબ્બાસ દાઉદનો ભત્રીજો શબ્બીર સાલેમામદ મોખાની વિરુદ્ધ આઈપીસી કલમ 323-324-504-506(2)-114 તથા જીપીએકટ 135(1) મુજબ ફરિયાદ નોંધાવી હતી.
ફરિયાદીએ તેના ઘર પાસે તેમની રીક્ષા પાર્ક કરી હતી અને આરોપી અબ્બાસે રીક્ષા અહીં પાર્ક કરવાની ના પાડતાં અહીં બધાં વાહન પાર્ક કરે છે તેમ ફરિયાદીએ કહેતાં આરોપીએ ઉશ્કેરાઈ જઈ, અપશબ્દો બોલીને અકરમને ઢીકા-પાટુનો માર માર્યો હતો.
એ વખતે અન્ય આરોપીએ ત્યાં દોડી આવી પાઈપ, છરી જેવા હથિયારોથી હુમલો કરીને ફરિયાદીને માથાના ભાગે તેમજ પેટના ભાગે ઈજાઓ પહોંચાડી હતી તેમજ જાનથી મારી નાખવાની ધમકી આપી જાહેરનામાનો ભંગ કરી આરોપી નાસી છૂટ્યાં હતાં, ઈજાગ્રસ્તને સારવાર માટે જીજી હોસ્પિટલમાં ખસેડવામાં આવ્યો હતો અને ફરિયાદ અનુસંધાને પોલીસ દ્વારા તપાસ ચલાવવામાં આવી રહી છે.
