જામનગરમાં ડીકેવી સર્કલ પાસે રિક્ષાની ટક્કર બાદ બે મહિલાઓએ ચાલકને જાહેરમાં મેથીપાક ચખાડ્યો!

• દારૂના નશામાં હોવાની આશંકા વચ્ચે રિક્ષાચાલક સાથે મહિલાઓ ની બોલાચાલી અને મારામારીનો વીડિયો સોશિયલ મીડિયામાં વાઈરલ

દેશ દેવી ન્યુઝ જામનગર તા. ૫,નવેમ્બર ૨૬ જામનગરના ડી.કે.વી. સર્કલ પાસે ગઈકાલે રાત્રે સાડા આઠેક વાગ્યાના અરસામાં અકસ્માત બાદ વિચિત્ર દૃશ્યો સર્જાયાં હતાં. પૂરપાટ ઝડપે આવી રહેલા એક રિક્ષાચાલકે આગળ જઈ રહેલા સ્કૂટરને ટક્કર મારતાં સ્કૂટર પર સવાર બે મહિલાઓ નીચે પટકાઈ પડી હતી. જોકે, અકસ્માત બાદ બંને મહિલાઓએ રોષે ભરાઈને રિક્ષાચાલક પર રીતસર તૂટી પડી હતી અને જાહેરમાં તેને મેથીપાક ચખાડ્યો હતો.આ બનાવને પગલે આસપાસના લોકોનાં ટોળાં એકત્ર થઈ ગયાં હતાં. પ્રત્યક્ષદર્શીઓના જણાવ્યા મુજબ રિક્ષાચાલક દારૂના નશામાં હોવાની આશંકા જણાતી હતી. આ દરમિયાન એક રાહદારીએ સમગ્ર ઘટનાનો વીડિયો પોતાના મોબાઈલમાં ઉતારી લીધો હતો, જે ગઈકાલે સોશિયલ મીડિયામાં વાઈરલ થતાં ચર્ચાનો વિષય બન્યો હતો.બીજી તરફ, બંને મહિલાઓએ રિક્ષાચાલક સાથે બોલાચાલી અને મારામારી કર્યા બાદ પોતાનું સ્કૂટર લઈને ત્યાંથી ચાલતી પકડી હતી, જ્યારે રિક્ષાચાલક પણ કોઈ વધુ માથાકૂટ કર્યા વિના રિક્ષા ચાલુ કરીને ત્યાંથી રવાના થઈ ગયો હતો.

જમીન પર દબાણના આક્ષેપોનો વીડિયો ઉતારી સોશિયલ મીડિયામાં મૂકવાની ધમકી આપી રૂા. ૫૦ હજારની માંગણી કર્યાનો આક્ષેપ

• કાલાવડના સેફરોન સ્કૂલના સંચાલક અને વોર્ડ નં. ૭ના કોર્પોરેટરની ફરિયાદઃ ‘આઈ લવ કાલાવડ’ પેજના સંચાલક સામે પોલીસમાં રજૂઆત

દેશ દેવી ન્યુઝ જામનગર તા. ૫,નવેમ્બર ૨૬ કાલાવડ તાલુકાના જાલણસર ગામે પોતાની પત્નીના નામે આવેલી જમીન પર સરકારી ખરાબાની જમીન પચાવી પાડવાના આક્ષેપો કરતો વીડિયો સોશિયલ મીડિયામાં પ્રસિદ્ધ નહીં કરવા માટે રૂા. ૫૦ હજારની માંગણી કરવામાં આવી હોવાનો આક્ષેપ ઉઠ્યો છે. આ મામલે કાલાવડની સેફરોન સ્કૂલના સંચાલક અને વોર્ડ નં. ૭ના કોર્પોરેટર રમેશભાઈ મોહનભાઈ દોંગાએ કાલાવડના વાલસી ગઢવી સામે પોલીસમાં ફરિયાદ નોંધાવી છે.ફરિયાદની વિગતો મુજબ, રમેશભાઈ દોંગાએ તા. ૨૭ જુલાઈ, ૨૦૨૧ના રોજ પોતાની પત્ની હીનાબેનના નામે જાલણસર ગામની સીમમાં રે.સ.નં. ૨૮૫ની કુલ ૧-૬૩-૩૦ હેક્ટર જમીન વેચાણથી ખરીદી હતી. દરમિયાન તા. ૨૯ ઓક્ટોબરના રોજ બપોરે તેમની સ્કૂલના ભાગીદાર વિવેકભાઈ ભંડેરીનો ફોન આવ્યો હતો. તેમણે ‘આઈ લવ કાલાવડ’ પેજના સંચાલક દ્વારા જમીનનો વીડિયો અને ઓડિયો મોકલવામાં આવ્યો હોવાનું જણાવ્યું હતું.આ વીડિયોમાં જમીન પર સરકારી ખરાબાની જગ્યા પર દબાણ કરવામાં આવ્યું હોવાના આક્ષેપો સાથે મહેસૂલ તંત્ર દ્વારા નિષ્પક્ષ તપાસ કરવાની માગણી કરવામાં આવી હતી. ત્યારબાદ વિવેકભાઈએ રમેશભાઈને જાણ કરી હતી કે પેજના સંચાલક વાલસી ગઢવીએ વીડિયો સોશિયલ મીડિયામાં પ્રસિદ્ધ નહીં કરવા માટે રૂા. ૫૦ હજારની માંગણી કરી છે. આ અંગે વિવેકભાઈએ મોબાઇલમાં વાતચીતનું રેકોર્ડિંગ પણ કર્યું હોવાનું ફરિયાદમાં જણાવાયું છે.ફરિયાદીના જણાવ્યા પ્રમાણે, નાણાં નહીં આપતાં વાલસી ગઢવીએ પોતાના ‘આઈ લવ કાલાવડ ૧’ નામના ઇન્સ્ટાગ્રામ પેજ પર જમીન અંગેના આક્ષેપો કરતો વીડિયો મૂક્યો હતો. તેમાં ભાજપના આગેવાન અને કોર્પોરેટર દ્વારા કરોડોની સરકારી જમીન પર દબાણ કરવામાં આવ્યું હોવાના આક્ષેપો કરવામાં આવ્યા હતા.આમ, વીડિયો પ્રસિદ્ધ નહીં કરવા માટે રૂા. ૫૦ હજારની માંગણી કરી નાણાં પડાવવાનો પ્રયાસ કરવામાં આવ્યો હોવાની તેમજ સોશિયલ મીડિયા પર ખોટા આક્ષેપો કરીને પોતાની પ્રતિષ્ઠાને નુકસાન પહોંચાડવામાં આવ્યું હોવાની રજૂઆત સાથે રમેશભાઈ દોંગાએ પોલીસ સમક્ષ ફરિયાદ નોંધાવી છે. આ સાથે વિવેકભાઈ દ્વારા કરવામાં આવેલા બે ઓડિયો રેકોર્ડિંગ પેનડ્રાઇવમાં રજૂ કરવામાં આવ્યા હોવાનું પણ ફરિયાદમાં જણાવાયું છે.

પરીક્ષામાં કેટી આવ્યા બાદ દાદાએ ઠપકો આપતાં કોલેજિયન યુવતીએ ગળાફાંસો ખાઈ જીવન ટૂંકાવ્યું

• જામનગરના હવાઈચોક વિસ્તારમાં કરુણ બનાવ : મોબાઇલ ઓછો જોઈ અભ્યાસમાં ધ્યાન આપવા દાદાએ સમજાવતાં મનમાં લાગી આવ્યું

દેશદેવી ન્યુઝ જામનગર તા ૨ :નવેમ્બર ૨૬ જામનગરના હવાઈચોક ભાનુશાળી વાડ વિસ્તારમાં રહેતી ૧૯ વર્ષની કોલેજિયન યુવતીએ પોતાના ઘરે ગળાફાંસો ખાઈ આપઘાત કરી લેતાં પરિવારમાં શોકની લાગણી ફેલાઈ છે.આ બનાવની પોલીસમાં જાહેર થયેલી વિગત મુજબ, હવાઈચોક ભાનુશાળી વાડ, શેરી નંબર-૮માં રહેતી પ્રિયંકાબેન હિતેશભાઈ કનખરા (૧૯) કોલેજમાં અભ્યાસ કરતી હતી. ગત વર્ષે પરીક્ષામાં તેને કેટી આવી હતી. આથી તેના દાદાએ મોબાઇલ ફોન ઓછો જોવા અને વાંચન તથા અભ્યાસમાં વધુ ધ્યાન આપવા સમજાવી ઠપકો આપ્યો હતો.દાદાની આ વાત યુવતીને મનમાં લાગી આવતાં તેણે ઘરના રસોડામાં છતના પંખા સાથે ચુંદડી બાંધી ગળાફાંસો ખાઈ લીધો હતો. જેના કારણે તેનું મૃત્યુ નીપજ્યું હતું.આ બનાવ અંગે મૃતક ના પિતા હિતેશભાઈ વિનુભાઈ કનખરાએ પોલીસને જાણ કરતાં સીટી એ. ડિવિઝન પોલીસે ભારતીય નાગરિક સુરક્ષા સંહિતાની કલમ ૧૯૪ મુજબ અકસ્માતે મૃત્યુ અંગે નોંધ કરી આગળની તપાસ હાથ ધરી છે.

વાસીદું કરવા નીકળેલી વૃદ્ધાને કાળમુખી કારની ટક્કર! ;જામનગર-રાજકોટ હાઈવે પર હિટ એન્ડ રન : કારની જોરદાર ટક્કરે વૃદ્ધા ગંભીર રીતે ઘાયલ!

• ફલ્લા ગામના ૬૩ વર્ષીય જયશ્રીબેન ધમસાણીયાને માથામાં ગંભીર ઈજા : અકસ્માત સર્જી કારચાલક નાસી છૂટ્યાની ફરિયાદ

દેશ દેવી ન્યુઝ જામનગર, તા. ૧નવેમ્બર ૨૬: જામનગર-રાજકોટ હાઈવે પર આવેલા ફલ્લા ગામ નજીક હિટ એન્ડ રનની ઘટના સામે આવી છે. વહેલી સવારે રસ્તો ઓળંગી રહેલી ૬૩ વર્ષીય વૃદ્ધાને પૂરઝડપે આવતી કારે અડફેટે લેતાં તેઓને માથાના ભાગે ગંભીર ઈજા પહોંચી હતી. અકસ્માત સર્જ્યા બાદ કારચાલક વાહન લઈને નાસી છૂટ્યો હોવાની ફરિયાદ પંચકોશી ‘એ’ ડિવિઝન પોલીસ મથકમાં નોંધાઈ છે.આ બનાવની મળતી વિગતો મુજબ, જામનગર તાલુકાના ફલ્લા ગામના પ્લોટ વિસ્તારમાં રહેતા ૬૮ વર્ષીય ખેડૂત બેચરભાઈ હિરાભાઈ ધમસાણીયાનાં પત્ની જયશ્રીબેન ઉર્ફે જયાબેન (ઉં.વ. ૬૩) ગત તા. ૩૧ ઓક્ટોબરના સવારે આશરે સાત વાગ્યે પોતાના ઘરેથી ગામ નજીક આવેલા વાડામાં વાસીદું કરવા માટે પગપાળા નીકળ્યાં હતાં.દરમિયાન સવા સાત વાગ્યાના અરસામાં જામનગર-રાજકોટ હાઈવે પર હનુમાનદાદાની ડેરી નજીક તેઓ રસ્તો ઓળંગી રહ્યાં હતાં. તે સમયે રાજકોટ તરફથી જામનગર તરફ આવતીજીજે-૦૩-એલજી-૧૦૯૭ નંબરની કારના ચાલકે પૂરઝડપે અને બેદરકારીપૂર્વક વાહન ચલાવી વૃદ્ધાને અડફેટે લીધાં હોવાનો ફરિયાદમાં આક્ષેપ કરવામાં આવ્યો છે.કારની જોરદાર ટક્કરથી વૃદ્ધા રસ્તા પર પટકાતાં માથાના ભાગે ગંભીર ઈજા પહોંચી હતી અને તેઓ બેભાન થઈ ગયાં હતાં. અકસ્માત બાદ કારચાલક વાહન ઊભું રાખવાને બદલે સ્થળ પરથી નાસી છૂટ્યો હોવાનું ફરિયાદમાં જણાવાયું છે.બનાવને પગલે આસપાસના લોકો ઘટનાસ્થળે એકત્ર થઈ ગયા હતા. સ્થાનિક નિલેશભાઈ નારણભાઈ ધમસાણીયાએ અકસ્માત અંગે વૃદ્ધાના પતિને જાણ કરી હતી. ત્યારબાદ પરિવારજનો દ્વારા ઈજાગ્રસ્ત વૃદ્ધાને સારવાર માટે રાજકોટ સિવિલ હોસ્પિટલમાં ખસેડવામાં આવ્યાં હતાં.ફરિયાદ મુજબ વૃદ્ધાને માથામાં ગંભીર ઈજા પહોંચી છે અને તેઓ બેભાન હાલતમાં હોસ્પિટલમાં સારવાર હેઠળ છે.આ બનાવ અંગે વૃદ્ધાના પતિ બેચરભાઈ ધમસાણીયાની ફરિયાદના આધારે પંચકોશી ‘એ’ ડિવિઝન પોલીસે સંબંધિત બી.એન.એસ. તથા મોટર વાહન અધિનિયમની કલમો હેઠળ ગુનો નોંધી કારચાલક સામે તપાસ હાથ ધરી છે.

જામનગરમાં શરમનાક ઘટના: સાડા બાર વર્ષની સગીરા પર બે વૃદ્ધોએ દુષ્કર્મ ગુજાર્યું, અધૂરા માસે મૃત બાળકનો જન્મ થતાં ભાંડો ફૂટ્યો

• ડીએનએ રિપોર્ટ અને સગીરાના નિવેદનના આધારે ૬૫ અને ૬૬ વર્ષના બંને આરોપીઓની ધરપકડ કરી જેલ હવાલે કરાયા

દેશ દેવી ન્યુઝ જામનગર: તા. ૧નવેમ્બર ૨૬ જામનગર શહેરમાં માનવતાને શરમાવે તેવી એક ગંભીર ઘટના સામે આવી છે. માત્ર સાડા બાર વર્ષની વય ધરાવતી સગીરા પર બે વૃદ્ધ શખ્સોએ દુષ્કર્મ ગુજાર્યું હોવાનો મામલો સામે આવ્યો છે. આ ઘટનાના પરિણામે સગીરા ગર્ભવતી બની હતી અને ગત ઓગસ્ટ મહિનાની બીજી તારીખે તેને પ્રસૂતિની પીડા ઉપડતાં છ માસના અધૂરા માસે જન્મેલા મૃત બાળકને જન્મ આપ્યો હતો. આ સમગ્ર મામલો સામે આવ્યા બાદ સિટી ‘બી’ ડિવિઝન પોલીસ હરકતમાં આવી હતી અને તપાસના અંતે ૬૫ તથા ૬૬ વર્ષના બંને આરોપીઓની ધરપકડ કરી જેલ હવાલે કર્યા છે.પ્રાપ્ત વિગતો અનુસાર, સાડા બાર વર્ષની સગીરા પર બે વૃદ્ધ શખ્સોએ દુષ્કર્મ ગુજાર્યું હતું. આ દરમિયાન સગીરા ગર્ભવતી બની હતી. ગત ઓગસ્ટ મહિનાની બીજી તારીખે સગીરાને પ્રસૂતિની પીડા ઉપડતાં તેને હોસ્પિટલમાં લઈ જવામાં આવી હતી, જ્યાં છ માસના અધૂરા માસે જન્મેલા મૃત બાળકનો જન્મ થયો હતો. આ બનાવ બાદ સમગ્ર મામલો પોલીસના ધ્યાન પર આવતાં સિટી ‘બી’ ડિવિઝન પોલીસે તપાસનો ધમધમાટ શરૂ કર્યો હતો.પોલીસે સગીરાના નિવેદનના આધારે તપાસ આગળ ધપાવી હતી અને ડીએનએ પરીક્ષણ માટે સગીરા, મૃત બાળક તથા શંકાસ્પદ બંને વૃદ્ધોના નમૂના લેવામાં આવ્યા હતા. ફોરેન્સિક તપાસના અહેવાલ અને સગીરાના નિવેદનના આધારે જુનસ એલિયાસ ચમડિયા (ઉંમર આશરે ૬૬ વર્ષ) તથા બશીર નૂરમામદ જોખિયા (ઉંમર આશરે ૬૫ વર્ષ)ની આ ગુનામાં સંડોવણી સામે આવતાં પોલીસે આજે બંનેની ધરપકડ કરી હતી.ધરપકડ બાદ બંને આરોપીઓને અદાલત સમક્ષ રજૂ કરવામાં આવતાં અદાલતના હુકમથી બંનેને જેલ હવાલે કરવામાં આવ્યા છે. બીજી તરફ, ભોગ બનેલી સગીરા હાલ પોતાની માતાના ઘરે રહેવા ચાલી ગઈ હોવાનું જાણવા મળ્યું છે.જામનગર શહેરમાં સગીર વયની બાળકી સાથે બનેલી આ અત્યંત ગંભીર ઘટનાએ સમાજમાં ચિંતાની લાગણી ફેલાવી છે. સિટી ‘બી’ ડિવિઝન પોલીસ દ્વારા આ પ્રકરણમાં વધુ તપાસ હાથ ધરવામાં આવી રહી છે.

જામનગર મહાનગર પાલિકાની હાઉસ ટેક્સ શાખામાં વેરાના રેકોર્ડ સાથે છેડછાડનો મામલો સામે આવ્યો!

• જામનગર મનપાની હાઉસ ટેક્સ શાખામાં રૂ. ૧.૫ લાખના વેરાની છેડછાડનો પર્દાફાશ : પાંચ આઉટસોર્સ કર્મચારીઓ સામે કાર્યવાહીની તલવાર!

• છ મિલકતોના બાકી વેરાની રકમ સિસ્ટમમાંથી ડિલીટ કરાઈ : સોફ્ટવેરના નોટિફિકેશનથી ભાંડો ફૂટતાં રેકોર્ડ પુનઃસ્થાપિત, ફોજદારી કાર્યવાહી સુધી મામલો પહોંચવાની શક્યતા

દેશ દેવી ન્યુઝ જામનગર, તા. ૩૧ : ઓક્ટોબર ૨૬ જામનગર મહાનગરપાલિકાની હાઉસ ટેક્સ શાખામાં આઉટસોર્સિંગથી ફરજ બજાવતા કર્મચારીઓ દ્વારા કોમ્પ્યુટર સોફ્ટવેરના લોગ-ઇન અધિકારોનો કથિત દુરુપયોગ કરીને મિલકતવેરાના રેકોર્ડમાં છેડછાડ કરવામાં આવી હોવાનો ગંભીર મામલો સામે આવ્યો છે. છેલ્લા બે મહિનામાં છ જેટલી મિલકતોના રૂ. ૧.૫ લાખથી વધુના બાકી વેરાની રકમ સિસ્ટમમાંથી ડિલીટ કરવામાં આવી હોવાનું અધિકારીઓની તપાસમાં સામે આવતાં પાંચ બિનકાયમી કર્મચારીઓ સામે વિભાગીય તેમજ ફોજદારી કાર્યવાહી થવાની શક્યતા ઊભી થઈ છે.પ્રાપ્ત વિગતો અનુસાર, મહાનગરપાલિકાની હાઉસ ટેક્સ શાખામાં અધિકારીઓની મદદ માટે આઉટસોર્સિંગ અને કરાર આધારિત કર્મચારીઓની નિમણૂક કરવામાં આવી છે. આ કર્મચારીઓને કામગીરી માટે સોફ્ટવેરમાં લોગ-ઇન કરવાની સુવિધા આપવામાં આવી હતી. જોકે, કેટલાક કર્મચારીઓએ આ અધિકારોનો ગેરઉપયોગ કરીને મિલકતધારકોના બાકી વેરાના રેકોર્ડમાં ફેરફાર કર્યા હોવાનું ધ્યાનમાં આવ્યું હતું.છ જેટલી મિલકતોના રૂ. ૧.૫ લાખથી વધુના બાકી વેરાની રકમ કોઈ ચુકવણી વિના સિસ્ટમમાંથી દૂર કરવામાં આવી હતી. સોફ્ટવેરમાં થયેલા ફેરફારો અંગે ઉચ્ચ અધિકારીઓને નોટિફિકેશન મળતું હોવાથી નિયમિત ચકાસણી દરમિયાન આ ગેરરીતિ સામે આવી હતી.મામલો ધ્યાનમાં આવતાં અધિકારીઓએ સંબંધિત કોમ્પ્યુટર ઓપરેટરોની પૂછપરછ હાથ ધરી હતી. જેમાં છેલ્લા બે મહિનાથી આ પ્રકારની પ્રવૃત્તિ ચાલતી હોવાની કબૂલાત કરવામાં આવી હોવાનું જાણવા મળે છે. ત્યારબાદ અધિકારીઓએ સંબંધિત મિલકતોની વિગતો એકત્ર કરીને વેરાના રેકોર્ડમાં જરૂરી સુધારા કરાવ્યા હતા. આ કામગીરીને કારણે મહાનગરપાલિકાની તિજોરીને થનારું આર્થિક નુકસાન અટકાવી શકાયું છે.

જામનગર ભાજપ કોર્પોરેટર ના પુત્રના ગોડાઉનમાંથી દારૂની ૧૯,૫૨૨ બોટલો ઝડપાઈ!

• માનસી હોટલ પાછળ પંચકોષી ‘એ’ ડિવિઝન પોલીસનો દરોડો: રૂ. ૫૩.૭૮ લાખનો મુદ્દામાલ કબજે

• એકની ધરપકડ, મુખ્ય સૂત્રધાર હિતેશ ઉર્ફે વાંગો બાંભણીયા સહિત ૧૦ આરોપીઓ ફરાર

દેશ દેવી ન્યુઝ જામનગર તા ૨૯ ઓક્ટોબર ૨૬: જામનગર મહાનગરપાલિકાના વોર્ડ નંબર ૧૦ ના ભાજપના મહિલા કોર્પોરેટર ના પુત્રના જામનગર-રાજકોટ હાઈવે પર માનસી હોટલ પાછળ આવેલા ગોડાઉનમાં વિદેશી દારૂના મોટા જથ્થાનું કટિંગ કરવામાં આવતું હોવાની બાતમીના આધારે પંચકોષી ‘એ’ ડિવિઝન પોલીસે દરોડો પાડી વિદેશી દારૂની ૧૯,૫૨૨ બોટલો સહિત કુલ રૂ. ૫૩,૭૮,૫૧૭નો મુદ્દામાલ કબજે કર્યો છે. પોલીસની આ કાર્યવાહીમાં એક વાહનચાલકની ધરપકડ કરવામાં આવી છે, જ્યારે મુખ્ય સૂત્રધાર તરીકે દર્શાવાયેલા જામનગર મહાનગરપાલિકાના વોર્ડ નંબર ૧૦ ના ભાજપ ના મહિલા કોર્પોરેટર મંજુબેન બાંભણિયા ના પુત્ર હિતેશ ઉર્ફે વાંગો નરશીભાઈ બાંભણીયા સહિત કુલ ૧૦ આરોપીઓને ફરાર દર્શાવી તેમની શોધખોળ હાથ ધરવામાં આવી છે.જામનગર મહાનગરપાલિકાના વોર્ડ નંબર ૧૦નાં ભાજપનાં મહિલા કોર્પોરેટર મંજુબેન બાંભણીયાના પુત્ર હિતેશ ઉર્ફે વાંગો બાંભણીયાનું નામ આ પ્રકરણમાં સામે આવતાં રાજકીય વર્તુળોમાં પણ ચર્ચા જાગી છે. જોકે, આ મામલે પોલીસની તપાસ અને કાયદાકીય કાર્યવાહી આગળ વધવાની બાકી છે.

બાતમીના આધારે ગોડાઉન પર દરોડો: રાજકોટ વિભાગના પોલીસ મહાનિરીક્ષક નિર્લિપ્ત રાય અને જામનગર જિલ્લા પોલીસ અધિક્ષક ડો. રવિ મોહન સૈની દ્વારા દારૂ-જુગારની ગેરકાયદેસર પ્રવૃત્તિઓ સામે કડક કાર્યવાહી કરવા આપવામાં આવેલી સૂચનાઓના અનુસંધાને નાયબ પોલીસ અધિક્ષક પિયુષ વાંદાના માર્ગદર્શન હેઠળ પંચકોષી ‘એ’ ડિવિઝન પોલીસની ટીમ પેટ્રોલિંગમાં હતી.આ દરમિયાન પોલીસ ઇન્સ્પેક્ટર આઈ.એ. ઘાસુરા, પોલીસ હેડ કોન્સ્ટેબલ હરદેવસિંહ એમ. ઝાલા તથા ગીરીરાજસિંહ કે. જાડેજાને સંયુક્ત રીતે ચોક્કસ બાતમી મળી હતી કે, જામનગર-રાજકોટ હાઈવે પર માનસી હોટલ પાછળ ભાજપના મહિલા કોર્પોરેટર ના પુત્ર હિતેશ ઉર્ફે વાંગો નરશીભાઈ બાંભણીયાના કબજા-ભોગવટાવાળા ગોડાઉનમાં વિદેશી દારૂનો મોટો જથ્થો ઉતારી તેનું કટિંગ કરવામાં આવી રહ્યું છે.

આ બાતમીના આધારે પોલીસે સ્થળ પર દરોડો પાડતાં ગોડાઉન પાસે બે અશોક લેલેન્ડ પીકઅપ અને એક ટાટા છોટા હાથી વાહનમાંથી દારૂની હેરફેર અને કટિંગની પ્રવૃત્તિ ચાલતી હોવાનું સામે આવ્યું હતું. પોલીસે સ્થળ પરથી અશોક લેલેન્ડ પીકઅપના ચાલક ધર્મેશભાઈ નવલભાઈ યાજ્ઞિક (ઉંમર ૩૭ વર્ષ, રહે. નવાગામ ઘેડ, સ્વામિનારાયણ સોસાયટી, જામનગર)ને ઝડપી લીધો હતો.

દારૂની ૧૯,૫૨૨ બોટલોનો જથ્થો મળ્યો : પોલીસે ગોડાઉન અને વાહનોની તલાશી લેતાં અલગ-અલગ બ્રાન્ડની વિદેશી દારૂની નાની-મોટી કુલ ૧૯,૫૨૨ બોટલો મળી આવી હતી. પોલીસે દારૂના જથ્થા ઉપરાંત દારૂની હેરફેરમાં ઉપયોગમાં લેવાયેલાં ત્રણ વાહનો અને એક મોબાઈલ ફોન પણ કબજે કર્યો હતો. જપ્ત કરાયેલા તમામ મુદ્દામાલની કુલ કિંમત રૂ. ૫૩,૭૮,૫૧૭ થવા જાય છે.

ઝડપાયેલા વાહનચાલકની પૂછપરછ દરમિયાન આ દારૂનો જથ્થો તેના મિત્ર હિતેશ ઉર્ફે વાંગો બાંભણીયાએ વેચાણના હેતુથી બહારથી મંગાવ્યો હોવાનું સામે આવ્યું હોવાનું પોલીસની યાદીમાં જણાવાયું છે. ગોડાઉનમાં દારૂનું કટિંગ કર્યા બાદ સ્થાનિક બુટલેગરો તથા અન્ય સંડોવાયેલા ઇસમોને વેચાણ માટે જથ્થો પહોંચાડવાનો હોવાની વિગતો પણ તપાસમાં બહાર આવી હોવાનું જણાવાયું છે.

મુખ્ય સૂત્રધાર સહિત ૧૦ આરોપીઓની શોધખોળ

આ પ્રકરણમાં હિતેશ ઉર્ફે વાંગો બાંભણીયા સહિત કુલ ૧૦ આરોપીઓને ફરાર દર્શાવવામાં આવ્યા છે. પોલીસે તમામને ઝડપી પાડવા માટે તપાસ અને શોધખોળ તેજ કરી છે. દારૂનો જથ્થો ક્યાંથી લાવવામાં આવ્યો હતો, તેની હેરફેરમાં કોણ-કોણ સંડોવાયેલું છે અને સ્થાનિક સ્તરે કોને વેચાણ માટે જથ્થો પહોંચાડવાનો હતો તે સહિતની કડીઓ મેળવવા પોલીસ તપાસ કરી રહી છે.

કબજે કરાયેલો રૂ. ૫૩.૭૮ લાખનો મુદ્દામાલ : વિદેશી દારૂની ૧૯,૫૨૨ બોટલો રૂ. ૪૦,૬૮,૫૧૭,અશોક લેલેન્ડ બડા દોસ્ત પીકઅપ (GJ 10 TY 1965)- રૂ. ૫,૦૦,૦૦૦ અશોક લેલેન્ડ દોસ્ત પીકઅપ (GJ 10 TX 6472) રૂ. ૫,૦૦,૦૦૦ /- ટાટા છોટા હાથી (GJ 10 TX 7053)- રૂ. ૩,૦૦,૦૦૦/-મોબાઈલ ફોન- રૂ. ૧૦,૦૦૦ /-કુલ મુદ્દામાલ- રૂ. ૫૩,૭૮,૫૧૭

પોલીસની યાદી મુજબ ફરાર દર્શાવાયેલા ૧૦ આરોપીઓ

(૧) હિતેશ ઉર્ફે વાંગો નરશીભાઈ બાંભણીયા — રાજપાર્ક, જામનગર.

(૨) સુનીલ ઉર્ફે ભૂતી ધનજીભાઈ દોણાસીયા — રાજપાર્ક, જામનગર.

(૩) સુનીલ બારૈયા — રાજપાર્ક, જામનગર.

(૪) દિલીપ — જૂના રેલવે સ્ટેશન પાસે, જામનગર.

(પ) મેરૂ રામા રબારી — પાસ્તર, ભાણવડ, દેવભૂમિ દ્વારકા જિલ્લો.

(૬) યોગેશ કોળી — ગુરુદ્વારા ચોકડી પાસે, જામનગર.

(૭) રાહુલ રેશીયા — ભીમવાસ, જામનગર.

(૮) વીમલો ડોડારો — જામનગર.

(૯) રોહિત કોળી — શંકરટેકરી, જામનગર.

(૧૦) જીગો સોલંકી ખવાસ — પંચેશ્વર ટાવર, જામનગર.

દરોડામાં કામગીરી કરનાર પોલીસ ટીમ પંચકોષી ‘એ’ ડિવિઝન પોલીસ સ્ટેશનના પોલીસ ઇન્સ્પેક્ટર આઈ.એ. ઘાસુરા, એ.એસ.આઈ. નિર્મળસિંહ બી. જાડેજા, જયપાલસિંહ વી. જાડેજા, પોલીસ હેડ કોન્સ્ટેબલ રામદેવસિંહ જે. જાડેજા, ચેતનભાઈ આર. ઘાઘરેટીયા, ગીરીરાજસિંહ કે. જાડેજા, હરદેવસિંહ એમ. ઝાલા તથા પોલીસ કોન્સ્ટેબલ કમલેશભાઈ, દિગ્વિજયસિંહ જાડેજા, કરણભાઈ શિયાર અને મયુરસિંહ ઝાલા સહિતના સ્ટાફે આ કામગીરી હાથ ધરી હતી.

જામનગર: રૂ. ૧૮ લાખના સરકારી સસ્તા અનાજના ઘઉં કૌભાંડમાં આરોપી અમરશીભાઈ ભંડેરીને સેશન્સ કોર્ટે આપી જામીનમુક્તિ

• ગરીબોના હકના ૭૦ હજાર કિલો ઘઉં રાત્રિના ગોડાઉનમાંથી ચોરી કરી વેચી નાખવાના કેસમાં મોટો વળાંક

• ​પોલીસ અને સરકારના વિરોધ છતાં બચાવ પક્ષની દલીલોગ્રાહ્ય રાખી કોર્ટે આપી જામીનમુક્તિ

દેશ દેવી ન્યુઝ તા. ૨૯ ઓક્ટોબર ૨૬ જામનગરમાં ચકચાર મચાવનાર રૂપિયા ૧૮ લાખના સરકારી સસ્તા અનાજના ઘઉંના કૌભાંડ કેસમાં જામનગર સેશન્સ કોર્ટ દ્વારા આરોપી અમરશીભાઈ છગનભાઈ ભંડેરીને જામીનમુક્ત કરવાનો હુકમ કરવામાં આવ્યો છે.​ગરીબોને રાશનકાર્ડ મારફતે આપવામાં આવતા અંદાજે ૭૦ હજાર કિલો જેટલા સસ્તા અનાજના ઘઉં રાત્રિના સમયે ગોડાઉનમાંથી ચોરી કરી બારોબાર વેપારીને વેચી નાખવાના આ કેસમાં જામનગર સીટી ‘બી’ ડિવિઝન પોલીસ દ્વારા અગાઉ પાંચ આરોપીઓને ઘઉંના જથ્થા સાથે ઝડપી પાડવામાં આવ્યા હતા. તપાસ દરમિયાન આ જથ્થો સરકારી અનાજનો હોવાનું અને રાત્રિના સમયે ગોડાઉનમાંથી ચોરી કરી જામનગરના વેપારીને બારોબાર વેચી દેવાયા હોવાનું બહાર આવ્યું હતું.​આ કેસમાં અંદાજે રૂ. ૧૮ લાખની કિંમતનો સસ્તા અનાજનો જથ્થો ચોરાયાનું બહાર આવતા પોલીસ દ્વારા પુરવઠા અધિકારીને જાણ કરાઈ હતી, જેના પગલે નાયબ જિલ્લા મેનેજર દ્વારા સીટી ‘બી’ ડિવિઝન પોલીસ સ્ટેશનમાં આવશ્યક ચીજવસ્તુ ધારા તથા અન્ય જુદી-જુદી કલમો હેઠળ ગુનો નોંધવામાં આવ્યો હતો. તપાસ દરમિયાન આ ઘઉંનો જથ્થો આરોપી અમરશીભાઈ છગનભાઈ ભંડેરીને વેચવામાં આવ્યો હોવાનું ખુલતા પોલીસે તેમની ધરપકડ કરી હતી.​આરોપી અમરશીભાઈ તરફથી જામીન અરજી દાખલ કરવામાં આવી હતી. જેમાં રજૂઆત કરાઈ હતી કે આરોપી વેપારી વર્ગના માણસ છે. સામે પક્ષે સરકારી વકીલ દ્વારા જામીનનો વિરોધ કરવામાં આવ્યો હતો અને તપાસ અધિકારીનું સોગંદનામું રજૂ કરી દલીલ કરાઈ હતી કે આ જથ્થો ગરીબ લોકો માટેની યોજનાનો હતો, જેને આરોપીઓએ એકસંપ થઈને બારોબાર વેચી નાખી સરકાર અને પ્રજા સાથે વિશ્વાસઘાત કર્યો છે.​બનાવની તમામ દલીલોને ધ્યાને રાખી નામદાર એડિશનલ સેશન્સ કોર્ટ દ્વારા આરોપી અમરશીભાઈ છગનભાઈ ભંડેરીને જામીનમુક્ત કરવાનો હુકમ કરવામાં આવ્યો છે. આ ચકચારી કેસમાં આરોપી તરફે જાણીતા વકીલ  રાજેશ ડી. ગોસાઈ, વિશાલ વાય. જાની, હરદેવસિંહ આર. ગોહિલ, રજનીકાંત આર. નાખવા, નિતેષ જી. મુછડીયા તથા કરણ કે. પટેલ રોકાયા હતા.

જામનગરની નંદનવન સોસાયટીમાં ૧૩ વર્ષીય બાળકી સાથે વારંવાર દુષ્કર્મ આચર્યાનો આરોપ : પાડોશી સામે પોક્સો સહિતની કલમો હેઠળ ગુનો નોંધાયો

• આરોપીની દીકરી સાથે રમવા જતી બાળકી સાથે દુષ્કર્મ થયાની પરિવારની ફરિયાદ, સીટી ‘એ’ ડિવિઝન પોલીસે આરોપીને પકડી આગળની તપાસ હાથ ધરી

દેશ દેવી ન્યુઝ જામનગર તા. ૨૮ઓક્ટોબર ૨૬, જામનગર શહેરની નંદનવન સોસાયટી વિસ્તારમાં ૧૩ વર્ષીય બાળકી સાથે દુષ્કર્મ આચર્યાની ચોંકાવનારી ઘટના સામે આવી છે. આ બનાવમાં પાડોશમાં રહેતા લાલજી લખમણ મકવાણા સામે બાળકી સાથે વારંવાર દુષ્કર્મ આચર્યાનો આરોપ મૂકવામાં આવ્યો છે. ભોગ બનનાર બાળકી આરોપીની દીકરી સાથે રમવા માટે તેના ઘરે જતી હોવાનો ઉલ્લેખ પરિવાર દ્વારા નોંધાવવામાં આવેલી ફરિયાદમાં કરવામાં આવ્યો છે.આ બનાવ અંગે બાળકીના પરિવારજનોએ જામનગરના સીટી ‘એ’ ડિવિઝન પોલીસ સ્ટેશનમાં ફરિયાદ નોંધાવી હતી. ફરિયાદના આધારે પોલીસે આરોપી લાલજી મકવાણા સામે પોક્સો એક્ટ સહિતની સંબંધિત કાયદાકીય કલમો હેઠળ ગુનો નોંધી તેની ધરપકડ કરી છે.પોલીસે આરોપીની પૂછપરછ સહિતની આગળની કાયદેસરની કાર્યવાહી હાથ ધરી છે. આ સંવેદનશીલ બનાવ અંગે જામનગર ગ્રામ્યના ઇન્ચાર્જ ડીવાયએસપી પિયુષ વાંદાએ વિઝીટેશન કર્યું હતું.

ફ્રી ફાયર ગેમના સંપર્કથી સગીરાનું અપહરણ: જામનગર સીટી ‘એ’ ડિવિઝન પોલીસની ટીમે આસામમાંથી આરોપીને ઝડપી લીધો

• મોબાઇલ ગેમમાં ઓળખાણ કેળવી, મેસેજ અને ફોન દ્વારા સંપર્ક કર્યા બાદ સગીરાને લલચાવી-ફોસલાવી લઈ ગયો; બોંગાઈગાંવ જિલ્લાના જોગીઘોપામાંથી બાળાને મુક્ત કરાવી પરિવારને સોંપાઈ

દેશ દેવી ન્યુઝ જામનગર, તા. ૨૮: મોબાઇલમાં રમાતી ફ્રી ફાયર વીડિયો ગેમના માધ્યમથી સગીર બાળા સાથે સંપર્ક કેળવી તેનું અપહરણ કરવાના ગુનામાં જામનગર સીટી ‘એ’ ડિવિઝન પોલીસને સફળતા મળી છે. જામનગર એસ.ટી. બસ સ્ટેન્ડ પરથી સગીરાનું અપહરણ થયા બાદ પોલીસે સીસીટીવી ફૂટેજ, હ્યુમન સોર્સ અને ટેક્નિકલ એનાલિસિસના આધારે તપાસ આગળ ધપાવી આસામ રાજ્યના બોંગાઈગાંવ જિલ્લાના જોગીઘોપા ગામેથી બાળાને શોધી કાઢી હતી. પોલીસે આરોપી પ્રદ્યુત કાર્તીક ચૌધરી (ઉંમર ૨૪)ને ઝડપી લઈ સગીરાને તેના માતા-પિતાને સુરક્ષિત રીતે સોંપી હતી.

આ અંગેની વિગતો મુજબ, ગત તા. ૮ ઓક્ટોબર, ૨૦૨૬ના રોજ સાંજના આશરે પોણા પાંચ વાગ્યાના અરસામાં જામનગર એસ.ટી. બસ સ્ટેન્ડ ખાતેથી કાલાવડ તાલુકાના ગ્રામ્ય વિસ્તારની સગીર વયની દીકરીનું કોઈ અજાણ્યો શખસ લલચાવી-ફોસલાવી અપહરણ કરી ગયો હતો. આ બનાવ અંગે જામનગર સીટી ‘એ’ ડિવિઝન પોલીસ સ્ટેશનમાં ગુનો નોંધાતાં સગીરાને શોધી કાઢવા તપાસ શરૂ કરવામાં આવી હતી.રાજકોટ વિભાગના નાયબ પોલીસ મહાનિરીક્ષક નિર્લિપ્ત રાય, જામનગર જિલ્લા પોલીસ અધિક્ષક ડૉ. રવિ મોહન સૈની તથા શહેર વિભાગના નાયબ પોલીસ અધિક્ષક જયવિરસિંહ એન. ઝાલાના માર્ગદર્શન હેઠળ સીટી ‘એ’ ડિવિઝનના પોલીસ ઇન્સ્પેક્ટર વી.એમ. ડોડીયાના નેતૃત્વમાં પોલીસ સબ ઇન્સ્પેક્ટર વી.આર. ધોરીયા અને સ્ટાફ દ્વારા અલગ-અલગ દિશામાં તપાસ હાથ ધરવામાં આવી હતી. આ દરમિયાન સીસીટીવી ફૂટેજની ચકાસણી સાથે હ્યુમન સોર્સ અને ટેક્નિકલ એનાલિસિસનો સહારો લેવામાં આવ્યો હતો.પોલીસ કોન્સ્ટેબલ ભગીરથસિંહ નરેન્દ્રસિંહ જાડેજાની તપાસમાં મહત્વની કડી મળી હતી. સગીરા મોબાઇલ ફોનમાં ફ્રી ફાયર વીડિયો ગેમ રમતી હતી અને આ ગેમમાં એક અજાણ્યા શખસે આઈડી બનાવી તેની સાથે રમવાનું શરૂ કર્યું હતું. ત્યારબાદ ગેમમાં મેસેજ મારફતે વાતચીત કરી સગીરાનો મોબાઇલ નંબર મેળવ્યો હતો અને ફોન દ્વારા સંપર્ક વધારી તેને લલચાવી-ફોસલાવી લઈ ગયો હોવાનું તપાસમાં બહાર આવ્યું હતું. સગીરા આસામ રાજ્યના બોંગાઈગાંવ જિલ્લાના જોગીઘોપા ગામે હોવાની માહિતી મળતાં પોલીસ દ્વારા તાત્કાલિક આગળની કાર્યવાહી હાથ ધરવામાં આવી હતી.

પોલીસ ઇન્સ્પેક્ટર વી.એમ. ડોડીયાએ પોલીસ સબ ઇન્સ્પેક્ટર વી.આર. ધોરીયા, એ.એસ.આઈ. રવીરાજસિંહ અનિરૂદ્ધસિંહ જાડેજા, પોલીસ કોન્સ્ટેબલ દિવ્યરાજસિંહ નવલસિંહ જાડેજા અને ભગીરથસિંહ નરેન્દ્રસિંહ જાડેજાની ટીમને આસામ મોકલી હતી. ત્યાં સઘન તપાસ હાથ ધરતાં સગીરા આરોપી પ્રદ્યુત કાર્તીક ચૌધરી (ઉંમર ૨૪, રહે. જોગીઘોપા, જિલ્લો બોંગાઈગાંવ, આસામ) સાથે મળી આવી હતી. પોલીસે સગીરાને શોધી મુક્ત કરાવી તેના માતા-પિતાને સોંપી હતી. આરોપી સામે ભારતીય ન્યાય સંહિતા તથા પોક્સો કાયદાની વિવિધ કલમો હેઠળ કાયદેસરની કાર્યવાહી હાથ ધરવામાં આવી છે.આ કામગીરીમાં પોલીસ ઇન્સ્પેક્ટર વી.એમ. ડોડીયા, પોલીસ સબ ઇન્સ્પેક્ટર વી.આર. જોરીયા, એ.એસ.આઈ. રવીરાજસિંહ જાડેજા તથા પોલીસ કોન્સ્ટેબલ ભગીરથસિંહ જાડેજા અને દિવ્યરાજસિંહ જાડેજાએ મહત્વની ભૂમિકા ભજવી હતી.

ઓનલાઇન ગેમ રમતાં બાળકોની સુરક્ષા અંગે વાલીઓને પોલીસની અપીલ

મોબાઇલ ગેમ અને સોશિયલ મીડિયાના વધતા ઉપયોગ વચ્ચે બાળકો અજાણી વ્યક્તિઓના સંપર્કમાં આવી શકે છે. આવી સ્થિતિમાં વાલીઓએ બાળકોની ઓનલાઇન પ્રવૃત્તિઓ પર નજર રાખવી, અજાણ્યા વ્યક્તિઓ સાથે મોબાઇલ નંબર કે અંગત માહિતી શેર ન કરવા સમજાવવું અને કોઈ લાલચ, દબાણ કે ધમકી મળે તો તાત્કાલિક પોલીસને જાણ કરવા પ્રોત્સાહિત કરવું જરૂરી છે, તેવી અપીલ પોલીસ દ્વારા કરવામાં આવી છે.