જામનગરમાં જૂના મનદુઃખનો ખાર રાખી યુવાનની કાર પર લોખંડના પાઇપથી હુમલો : કાચ તોડી યુવાન અને તેના સાથીને માર માર્યો, જાનથી મારી નાખવાની ધમકી

• ખોડિયાર કોલોનીમાં રાજ ચેમ્બર સામે બુલેટ આડું રાખી કાર આંતરી સાત શખ્સોનો આતંક; કારમાં તોડફોડ કરી મોબાઇલ ઝૂંટવવાનો પ્રયાસ

• આરોપી : – (૧) હસમુખ રબારી (૨) કીશન ખાભલા (૩) વિજય રબારી (૪) રાજ રબારી તથા અજાણ્યા ત્રણ ઇસમો રહે. જામનગર

દેશ દેવી ન્યુઝ જામનગર, તા. ૧૧ નવેમ્બર ૨૬ જામનગરના ખોડિયાર કોલોની વિસ્તારમાં રાજ ચેમ્બર સામે રોડ પર જૂના મનદુઃખના કારણે એક યુવાનની કાર આંતરી સાત શખ્સોએ લોખંડના પાઇપ વડે હુમલો કરી કારના કાચ, દરવાજા અને લાઇટમાં તોડફોડ કરી હતી. આ હુમલામાં કારચાલક યુવાન તથા તેની સાથે રહેલા સાહેદને ઇજાઓ પહોંચાડવામાં આવી હતી. ઉપરાંત જાનથી મારી નાખવાની ધમકી આપી મોબાઇલ ઝૂંટવી લેવાનો પ્રયાસ પણ કરવામાં આવ્યો હતો.આ બનાવની વિગત મુજબ લાલપુર તાલુકાના જોગવડ ગામે રહેતા ૨૧ વર્ષના ધવલ જીતેશભાઈ વાસુ બ્રાહ્મણ તથા તેમના પિતાને જોગવડ ગામ પાસે આરોપીઓના સંબંધીઓ સાથે ઝઘડો થયો હતો. આ બાબતનો ખાર રાખીને ગત તા. ૯ નવેમ્બરના રોજ ધવલ જી.જી. હોસ્પિટલમાં સારવાર કરાવી પોતાની કાર નં. જીજે-૧૦-ડીઆર-૮૫૨૫માં ઘરે જઈ રહ્યા હતા, ત્યારે બપોરે આશરે પોણા ચાર વાગ્યાના અરસામાં ખોડિયાર કોલોનીમાં રાજ ચેમ્બર સામે આરોપી હસમુખ રબારી અને કિશન ખાભલાએ પોતાનું બુલેટ મોટરસાઇકલ કારની આગળ આડું રાખી રસ્તો રોક્યો હતો.ત્યારબાદ બંને શખ્સોએ લોખંડના પાઇપ વડે કારમાં આડેધડ ફટકા મારી કાચ તોડી નાખ્યા હતા અને ધવલને પાઇપ વડે માર મારી ડાબા પડખા તથા ડાબા હાથમાં મુંઢ ઇજાઓ પહોંચાડી હતી. આ ઉપરાંત બેફામ ગાળો આપી જાનથી મારી નાખવાની ધમકી આપી હતી. આરોપી હરજીએ ધવલ પાસેથી મોબાઇલ ફોન ઝૂંટવી લેવાનો પ્રયાસ પણ કર્યો હતો.આ દરમિયાન બંને શખ્સોએ ધવલની સાથે રહેલા ભરતભાઈને પણ લોખંડના પાઇપ વડે છાતી તથા જમણા હાથના ભાગે માર મારી ઇજાઓ પહોંચાડી હતી અને ગાળો ભાંડી જાનથી મારી નાખવાની ધમકી આપી હતી.આ ઉપરાંત સ્વિફ્ટ કાર જીજે-૧૦-ઈએચ-૯૭૦૦માં આરોપી વિજય રબારી, રાજ રબારી તથા અન્ય ત્રણ અજાણ્યા શખ્સો ત્યાં આવી પહોંચ્યા હતા અને લોખંડના પાઇપ વડે ધવલની કારમાં તોડફોડ કરી કાચ, દરવાજા તથા લાઇટને નુકસાન પહોંચાડ્યું હતું. આમ, સાત શખ્સોએ એકબીજાની મદદગારીથી હુમલો કરી આતંક મચાવ્યો હતો.આ અંગે ધવલ જીતેશભાઈ વાસુની ફરિયાદના આધારે જામનગર સીટી-સી ડિવિઝન પોલીસ સ્ટેશનમાં હસમુખ રબારી, કિશન ખાભલા, વિજય રબારી, રાજ રબારી તથા અન્ય ત્રણ અજાણ્યા શખ્સો સામે ભારતીય ન્યાય સંહિતાની વિવિધ કલમો તથા જી.પી. એક્ટની કલમ ૧૩૫(૧) હેઠળ ગુનો નોંધવામાં આવ્યો છે. બનાવ અંગે વધુ તપાસ પોલીસ સબ ઇન્સ્પેક્ટર એમ.એમ. કુંભારવાડિયા ચલાવી રહ્યા છે.

જામનગર : જોગવડ પાટિયા પાસે જૂની તકરારનો ખાર રાખી બંને જૂથ સામસામે આવી ગયાં : સામસામી ફરિયાદો નોંધાઈ

• સ્કોર્પિયો અને હેરિયર કારમાં આવેલા શખ્સોએ લાકડાના ધોકા અને લોખંડના પાઇપ વડે હુમલો કર્યો, બંને પક્ષના લોકો ઘવાયા

• આરોપી – (૧) કરશનભાઈ આલાભાઈ વાધેલા તથા (૨) વરશીગભાઈ મેઘાભાઈ ભાંગરા તથા અન્ય પાંચ અજાણ્યા

• આરોપી :- (૧) નરેન્દ્ર વાસુ ઉર્ફે મુનાભાઈ વાંસુ,(૨) ધવલ વાસુ,(૩) સુમિત વાસુ,(૪) વિજય ભટ્ટ,(૫) જીતાભાઈ વાસુ (૬) ત્રણ અજાણ્યા ઈસમો

દેશ દેવી ન્યુઝ જામનગર, તા. ૧૧નવેમ્બર ૨૬ : જામનગર જિલ્લાના મેઘપર (પડાણા) પોલીસ મથક હેઠળના જોગવડ પાટિયા પાસે દેપાણી હોટેલ નજીક વાહન ચલાવવા બાબતે થયેલી જૂની તકરારનો ખાર રાખીને બે જૂથ વચ્ચે હિંસક અથડામણ થતાં સામસામી ફરિયાદો નોંધાઈ છે. બંને પક્ષના શખ્સોએ એકબીજા પર લાકડાના ધોકા અને લોખંડના પાઇપ વડે હુમલો કરી ઇજાઓ પહોંચાડી હતી.પ્રથમ બનાવમાં જોગવડ ગામે રહેતા નરેન્દ્રભાઈ ઉર્ફે મુન્નાભાઈ ગાંગારામભાઈ વાસુએ ફરિયાદ નોંધાવી છે કે, ગત તા. ૮ના રાત્રિના સમયે તેમના પુત્ર સુમિત, ભત્રીજા ધવલ અને ભાણેજ પાર્થ હેરિયર કારમાં જતા હતા, ત્યારે કરશનભાઈ આલાભાઈ વાઘેલાએ સ્કોર્પિયો કાર આડી કરી તેમને રોક્યા હતા. ત્યારબાદ સાહેદોને માર મારી ગાળો આપી ત્યાંથી નીકળી જવાની ધમકી આપી હતી.

આ બનાવના અનુસંધાને તા. ૯ના સવારે કરશનભાઈ વાઘેલાએ ફોન કરીને ફરિયાદી અને અન્ય લોકોને જોગવડ પાટિયા પાસે દેપાણી હોટેલ નજીક બોલાવ્યા હતા. જ્યાં કરશનભાઈ, વરશીંગભાઈ ભાંગરા તથા અન્ય પાંચ અજાણ્યા શખ્સોએ ભેગા મળી ગેરકાયદે મંડળી રચી હતી અને લાકડાના ધોકા વડે હુમલો કર્યો હતો. આ હુમલામાં નરેન્દ્રભાઈને મુઢમાર મારવામાં આવ્યો હતો. જ્યારે વિજય ભટ્ટને જમણા હાથમાં, જીતેશભાઈને ડાબા હાથના કાંડા પાસે ઇજા થઈ હતી. અન્ય લોકોને પણ માર મારી ઇજાઓ પહોંચાડવામાં આવી હતી. આ અંગે મેઘપર (પડાણા) પોલીસ મથકમાં સાત શખ્સો સામે ફરિયાદ નોંધાઈ છે.બીજી તરફ સામા પક્ષે જોગવડ પાટિયા પાસે રહેતા કરશનભાઈ આલાભાઈ વાઘેલાએ ફરિયાદ નોંધાવી છે કે, ગત તા. ૮ના રોજ કાર ચલાવવા બાબતે થયેલી બોલાચાલીનો ખાર રાખીને નરેન્દ્રભાઈ વાસુએ ફોન કરી ગાળો ભાંડી હતી. ત્યારબાદ નરેન્દ્રભાઈ, ધવલ વાસુ, સુમિત વાસુ, વિજય ભટ્ટ, જીતાભાઈ વાસુ તથા અન્ય ત્રણ અજાણ્યા શખ્સો હેરિયર કારમાં જોગેશ્વર હોટેલ પાસે આવ્યા હતા.

આ શખ્સોએ ગેરકાયદે મંડળી રચી હાથમાં લાકડાના ધોકા અને લોખંડના પાઇપ ધારણ કર્યા હતા. આ દરમિયાન નરેન્દ્રભાઈએ કરશનભાઈના ડાબા હાથમાં ધોકાનો ઘા માર્યો હતો, જ્યારે વિજય ભટ્ટે લોખંડના પાઇપ વડે જમણા પગમાં ફટકો માર્યો હતો. ત્યારબાદ માથાના પાછળના ભાગે પણ ધોકાનો ઘા ઝીંકી અન્ય શખ્સોએ આડેધડ માર મારતાં બંને પગ અને ડાબા હાથ સહિત શરીરે ઇજાઓ થઈ હતી.બંને પક્ષે એકબીજા સામે ગાળો ભાંડી, જાનથી મારી નાખવાની ધમકી આપી અને હથિયારબંધીના જાહેરનામાનો ભંગ કરી હુમલો કર્યાની ફરિયાદ નોંધાવી છે. મેઘપર (પડાણા) પોલીસે બંને ગુનામાં સામસામી ફરિયાદો નોંધી આગળની તપાસ હાથ ધરી છે.

જામનગરમાં મેમણ યુવાન નો અગમ્ય કારણોસર આપઘાત: સમાજમાં શોક ની લાગણી

• પોતાના ઘરે પંખામાં દુપટ્ટો બાંધી ગળેફાંસો ખાધો : સિટી-એ ડિવિઝન પોલીસ દ્વારા આપઘાતનું કારણ જાણવા તપાસ શરૂ

દેશ દેવી ન્યુઝ જામનગર તા ૧૦ નવેમ્બર ૨૬, જામનગર શહેરના કાલાવડ નાકા બહાર આવેલ રબાની પાર્ક વિસ્તારમાં રહેતા મોહમદસોયબ ઇસાભાઇ મંઢા (ઉ.વ.૩૫) નામના મેમણ યુવાને અગમ્ય કારણોસર પોતાના ઘરે પંખામાં દુપટ્ટો બાંધી પોતાના હાથે ગળાફાંસો ખાઈ લેતા તેમનું મૃત્યુ નિપજ્યું હતું.આ અંગે મૃતક ના ભાઇ સોહિલ મંઢા દ્વારા પોલીસને જાણ કરાતાં સિટી-એ ડિવિઝન પોલીસ સ્ટેશન એએસઆઇ બસીરભાઇ મલેક તથા સ્ટાફે ઘટના સ્થળે પહોંચી જઇ મૃતદેહ નો કબ્જો સંભાળી પીએમ અર્થે સરકારી જી.જી.હોસ્પિટલમાં ખસેડી આપઘાતનું કારણ જાણવા આગળની તપાસ હાથ ધરી હતી.

જામનગર સેસન્સ કોર્ટનો મોટો ચુકાદો: રૂ. ૧૦ લાખના ચેક બાઉન્સ કેસમાં આરોપી નિર્દોષ જાહેર, નીચલી કોર્ટની સજા રદ

• ​સમયમર્યાદા બહારનું (Time-Barred) કાળગ્રસ્ત દેવું કલમ ૧૩૮ હેઠળ વસૂલ કરવા પાત્ર નથી: સેસન્સ કોર્ટની મહત્ત્વની સ્પષ્ટતા

• ​કાલાવાડ કોર્ટે ફટકારેલી ૧-૧ વર્ષની સાદી કેદ અને વળતરના આદેશો સેસન્સ કોર્ટે રદબાતલ (Quashed & Set Aside) કર્યા.

દેશ દેવી ન્યુઝ ​જામનગર, તા. ૦૭ નવેમ્બર ૨૬ જામનગર સેસન્સ કોર્ટ દ્વારા નેગોશિયેબલ ઇન્સ્ટ્રુમેન્ટ એક્ટની કલમ ૧૩૮ હેઠળના રૂ. ૫-૫ લાખ (કુલ રૂ. ૧૦ લાખ) ના ચેક રિટર્ન અંગેના બે ક્રિમિનલ અપીલ કેસોમાં આરોપીના બચાવ પક્ષની કાનૂની દલીલો માન્ય રાખી આરોપીને તમામ આક્ષેપોમાંથી નિર્દોષ ઠરાવી મુક્ત કરવાનો મહત્ત્વનો ચુકાદો આપવામાં આવ્યો છે. સેસન્સ કોર્ટે નામદાર જ્યુશિયલ મેજિસ્ટ્રેટ સાહેબ કાલાવાડ દ્વારા આરોપીને ફટકારવામાં આવેલી ૧-૧ વર્ષની સાદી કેદની સજા અને રૂ. ૫-૫ લાખના વળતરના આદેશોને રદબાતલ કર્યા છે.આ ​કેસની હકીકત એવી છે કે મૂળ આરોપી ઇકબાલભાઇ સુલેમાનભાઇ છેર (રહે. વૈશાલી નગર, ધારાનગર, જામનગર) સામે મૂળ ફરિયાદી સાફીભાઇ અબુભકરભાઇ બારડી (રહે. ભુરાવડી સ્ટ્રીટ, કાલાવાડ) તથા સાબેરાબેન આદમભાઇ દ્વારા રૂ. ૫,૦૦,૦૦૦/- ની રકમ પેટે મેળવેલ HDFC એચ.ડી.એફ.સી. બેંકના ચેકો બેંકમાં રજૂ કરતા અપૂરતા બેલેન્સ (Funds Insufficient) ના શેરા સાથે પરત ફરતા કલમ ૧૩૮ હેઠળ કેસ નોંધાયા હતા. જે કેસમાં અદાલતે તા. ૦૩/૦૧/२०૨૫ ના રોજ આરોપીને દોષિત ઠેરવી સજાનો હુકમ કર્યો હતો.

આ સજાના હુકમ સામે આરોપીએ જામનગર સેસન્સ કોર્ટમાં ક્રિમિનલ અપીલ દાખલ કરી હતી. આરોપી વતી રોકાયેલા વિદ્વત એડવોકેટ દ્વારા સેસન્સ કોર્ટ સમક્ષ રજૂઆત કરાઈ હતી કે નોટરી સમક્ષ થયેલા કરારનામા મુજબ રકમ તા. ૦૮/૦૪/૨૦૧૯ ના રોજ લેવામાં આવી હતી અને તેની પરત ચૂકવણીની છેલ્લી તારીખ ૨૩/૦૭/૨૦૧૯ હતી.લિમિટેશન એક્ટ (Law of Limitation) અનુસાર સિવિલ દાવો દાખલ કરવાની ૩ વર્ષની મુદત તા. ૨૨/૦૭/૨૦૨૨ ના રોજ પૂર્ણ થઈ ગઈ હતી, ત્યારબાદ જમા કરાવેલ ચેક કાયદાની દૃષ્ટિએ ‘કાયદેસર રીતે વસૂલ કરવા પાત્ર દેવું’ (Legally Enforceable Debt or Liability) ગણાતું નથી. જેથી કલમ ૧૩૮ હેઠળનો ગુનો બનતો નથી.

ઉભય પક્ષની દલીલો અને કાનૂની ન્જીરો ધ્યાને લીધા બાદ જામનગરના માનનીય એડિશનલ સેસન્સ જજશ્રીએ બચાવ પક્ષની દલીલો તથા લિમિટેશન એક્ટની જોગવાઈઓ સંપૂર્ણપણે ગ્રાહ્ય રાખી બંને ક્રિમિનલ અપીલો મંજૂર કરી છે. સેસન્સ અદાલતે નીચલી કોર્ટના સજાના હુકમો રદબાતલ ઠરાવી, ઇકબાલભાઇ સુલેમાનભાઇ છેરને તમામ આક્ષેપોમાંથી સંપૂર્ણ નિર્દોષ ઠરાવી મુક્ત કરવાનો આદેશ ફરમાવ્યો છે. આ બંને અપીલોમાં આરોપી તરફથી સિનિયર ધારાશાસ્ત્રી એડવોકેટ અશોક એચ. જોશી રોકાયેલા હતા.

જામનગર : ૧૫૩ કરોડથી વધુની મિલકતો વ્યાજમાં પડાવી લીધેલ તેમજ ખંડણીનો મામલો: ગુજરાત હાઇકોર્ટ દ્વારા તમામ ૧૧ આરોપીઓની આગોતરા જામીન અરજીમાં ધરપકડ પર સ્ટે 

• વ્યાજખોરી અને ખંડણીના ચકચારી કેસમાં ૧૧ આરોપીઓને વચગાળાની રાહત.

• સિનિયર એડવોકેટ નાથાલાલ પી. ઘાડીયા, હસમુખ મોલીયા, અંસીન દેસાઈ, પ્રવીણ ગોંડલિયા સહિતના કાઉન્સિલ દ્વારા અસરકારક દલીલો.

• સ્યુસાઇડ નોટ અને જમીન-મિલકતના વ્યવહારોને લઈને અગ્રણી મેરામણભાઇ પરમાર ના કેસમાં નવો વળાંક!

• સુસાઇડ નોટમાં મહિલાઓના તેમજ વિશાલ દોમડીયાનું પણ નામ નથી!

દેશ દેવી ન્યુઝ જામનગર / અમદાવાદ: તા. ૬ નવેમ્બર ૨૬  ગુજરાતમાં ચકચાર જગાવનાર ૧૫૩ કરોડ રૂપિયાથી વધુની વ્યાજખોરી અને ખંડણી વસૂલાતના ગંભીર મામલામાં નામદાર ગુજરાત હાઇકોર્ટે દ્વારા આરોપીઓની આગોતરા જામીન અરજીમાં એક મોટો આદેશ આપ્યો છે. કોર્ટે આ કેસમાં સંડોવાયેલા તમામ ૧૧ આરોપીઓની ધરપકડ ઉપર હાલ પૂરતો સ્ટે ફરમાવી દીધો છે, જેના પગલે આરોપીઓને મોટી રાહત મળી છે.​આ કેસમાં મૃતક મેરામણભાઈ હરદાસભાઈ પરમારના રહસ્યમય અવસાન સાથે જોડાયેલો છે. પ્રાપ્ત વિગતો અનુસાર, ગત ૧૦ જાન્યુઆરી ૨૦૨૫ના રોજ તેઓ કે.ડી. હોસ્પિટલમાં બેભાન અવસ્થામાં લઇ જવામાં આવેલ હતા અને ડેથ સમરી મુજબ કાર્ડિયાક અરેસ્ટ તથા હૃદય સંબંધિત જટિલતાઓને કારણે તેમનું અવસાન થયું હતું. આ મામલે લાંબા સમય બાદ ૨૭ ઓગસ્ટ ૨૦૨૬ ના રોજ એફઆઈઆર (FIR) દાખલ કરવામાં આવી હતી, જ્યારે અગાઉ ૩૧ જાન્યુઆરી ૨૦૨૫ના રોજ પણ કેટલીક વ્યક્તિઓના નામ સાથે ગાંધીનગર પોલીસમાં ફરિયાદ નોંધવા અરજી થઈ હતી.

​સ્યુસાઇડ નોટ અને પ્રોપર્ટી વિવાદની તપાસ ​પ્રોસિક્યુશન દ્વારા ૨૯ ડિસેમ્બર ૨૦૨૪ અને ૨ જાન્યુઆરી ૨૦૨૫ ની સ્યુસાઇડ નોટ્સને આધાર બનાવવામાં આવ્યો છે, જે ૨૧ જાન્યુઆરી ૨૦૨૫ના રોજ મળી આવી હતી. જેમાં વ્યાજખોરી અને નાણાકીય લેવડદેવડ બાબતે હેરાનગતિના આક્ષેપો કરાયા છે. જો કે, તપાસના કાગળો અને દસ્તાવેજો દર્શાવે છે કે મૃતક અને તેમના પરિવાર દ્વારા રજિસ્ટર્ડ વેચાણ દસ્તાવેજો કરવામાં આવ્યા હતા, તેમજ ધીરાણ કરેલી રકમ અને પ્રોપર્ટી બાબતે દીવાની (સિવિલ) દાવાઓ પણ અગાઉથી દાખલ થયેલા છે. ખાસ કરીને, મહિલાઓને ફરિયાદમાં આરોપી બનાવેલ છે પરંતુ સ્યુસાઇડ નોટમાં તેઓના નામો દર્શાવેલા નથી અને તેઓ માત્ર મૃતક પાસેથી મિલકત ખરીદનાર તરીકેની ભૂમિકામાં છે.​હાઇકોર્ટમાં મજબૂત રજૂઆતો અને વચગાળાનું રક્ષણ, બંન્ને પક્ષની દલીલોને ધ્યાને રાખીને નામદાર ગુજરાત હાઈકોર્ટે પ્રાથમિક તબક્કે અરજદારોને ધરપકડ સામે વચગાળાનું રક્ષણ આપ્યું છે. આગામી તારીખ સુધી કોઈ પગલાં ન લેવા આદેશ કર્યો છે.અને હવે પછી અરજીની સુનાવણી તારીખ ૧૬ ડિસેમ્બર ના રોજ મુકરર કરવામાં આવેલ છે.​આ સમગ્ર કેસમાં પટેલ અગ્રણી એવા પ્રવીણભાઈ લક્ષમણભાઇ દોમડીયા, વિશાલભાઈ પ્રવીણભાઈ દોમડીયા, અને કાંતાબેન પ્રવીણભાઈ દોમડીયા તરફથી ગુજરાત હાઇકોર્ટમાં જાણીતા જામનગરના વરિષ્ઠ એડવોકેટ નાથાલાલ પી. ઘાડીયા, હસમુખ એમ. મોલીયા, અર્પિત એમ. રૂપાપરા, પરેશ એસ. સભાયા તથા ગુજરાત હાઇકોર્ટમાં સિનિયર કાઉન્સિલ અંસીન દેસાઈ અને પ્રવીણ ગોંડલીયાનાઓ રોકાયેલ છે.

​રૂ. ૮૧ લાખના કોપર કૌભાંડમાં મોટો વળાંક: મુખ્ય આરોપીને અદાલત દ્વારા આગોતરા જામીન મંજૂર

• ​મોરબી અને જામનગર સાથે સંકળાયેલા છેતરપિંડીના કેસમાં નામદાર હાઈકોર્ટનો મહત્વનો આદેશ

• ઠગાઈ કરવાના ઇરાદે માલ મંગાવી પૈસા ન ચૂકવવાનો ચકચારી કેસ

• ​આરોપી મુખ્ય સૂત્રધાર છે અને ખોટું નામ ધારણ કરી માલ મંગાવ્યાના આક્ષેપો પાયા વિહોળા છે. : ધારાશાસ્ત્રી રાજેશ ગોસાઈ

દેશ દેવી ન્યુઝ જામનગર તા. ૬ નવેમ્બર ૨૬ મોરબી ખાતે વસવાટ કરતા અને પ્રાઇમ મેટલના નામે ભાગીદારી પેઢી ચલાવતા ફરિયાદી મીતભાઈ દેવાભાઈ અવાડીયાએ જામનગર પંચકોશી ‘બી’ ડિવિઝન પોલીસ સ્ટેશનમાં ફરિયાદ નોંધાવી હતી. ફરિયાદીએ જામનગરના પરેશભાઈ દેવશીભાઈ ગોહીલ સાથે એગ્રીમેન્ટ કરીને રૂ. ૮૧ લાખની કિંમતનો ૫૦૦૦ કિલો મીલબેરી પ્રકારનો કોપરનો માલ વેચાણ અર્થે તેમની પેઢીના ગોડાઉને પહોંચાડ્યો હતો. પેમેન્ટ ન મળતા અને તપાસ કરતા માલ મંગાવીને ઠગાઈ કરવામાં આવી હોવાનું તેમજ માલ ઉતારેલી જગ્યા પરેશભાઈની ન હોવાનું સામે આવ્યું હતું.આ માલ પરેશભાઈએ દેવેન્દ્રસિંહ અને જયરાજસિંહને વેચી નાખ્યો હતો, જેઓએ વિનુકુમાર બાહેદીયાને અને સંજયસિંહ ઝાલાએ ‘ગોપાલભાઈ’ તરીકે ખોટું નામ ધારણ કરી ફરિયાદી સાથે વાતચીત કરી હતી.આ કેસમાં કોઈ જ એગ્રીમેન્ટમાં હાલના આરોપીનું નામ કે સહીઓ ન હોવા છતાં, તેમજ માલ ફરિયાદી જાતે ઉતારવા આવેલ હોવા છતાં અને માલ રિકવર થઈ ગયેલ હોવાના મુદ્દાઓને ધ્યાને રાખી નામદાર ગુજરાત હાઈકોર્ટે મુખ્ય આરોપી ભુપેન્દ્રસિંહ જયેન્દ્રસિંહ જાડેજાને આગોતરા જામીન મુક્ત કરવાનો હુકમ કર્યો છે.આ કેસમાં જામનગર ખાતે વકીલ  રાજેશ ડી. ગોસાઈ, વિશાલ વાય. જાની, હરદેવસિંહ આર. ગોહીલ, રજનીકાંત આર. નાખવા, નિતેશ જી. મુછડીયા તેમજ કરણ કે. પટેલ રોકાયેલા હતા, જ્યારે નામ. ગુજરાત હાઈકોર્ટ સમક્ષ વકીલ  પ્રેમલ એસ.રાચ્છ રોકાયેલા હતા.

જામનગરમાં ડીકેવી સર્કલ પાસે રિક્ષાની ટક્કર બાદ બે મહિલાઓએ ચાલકને જાહેરમાં મેથીપાક ચખાડ્યો!

• દારૂના નશામાં હોવાની આશંકા વચ્ચે રિક્ષાચાલક સાથે મહિલાઓ ની બોલાચાલી અને મારામારીનો વીડિયો સોશિયલ મીડિયામાં વાઈરલ

દેશ દેવી ન્યુઝ જામનગર તા. ૫,નવેમ્બર ૨૬ જામનગરના ડી.કે.વી. સર્કલ પાસે ગઈકાલે રાત્રે સાડા આઠેક વાગ્યાના અરસામાં અકસ્માત બાદ વિચિત્ર દૃશ્યો સર્જાયાં હતાં. પૂરપાટ ઝડપે આવી રહેલા એક રિક્ષાચાલકે આગળ જઈ રહેલા સ્કૂટરને ટક્કર મારતાં સ્કૂટર પર સવાર બે મહિલાઓ નીચે પટકાઈ પડી હતી. જોકે, અકસ્માત બાદ બંને મહિલાઓએ રોષે ભરાઈને રિક્ષાચાલક પર રીતસર તૂટી પડી હતી અને જાહેરમાં તેને મેથીપાક ચખાડ્યો હતો.આ બનાવને પગલે આસપાસના લોકોનાં ટોળાં એકત્ર થઈ ગયાં હતાં. પ્રત્યક્ષદર્શીઓના જણાવ્યા મુજબ રિક્ષાચાલક દારૂના નશામાં હોવાની આશંકા જણાતી હતી. આ દરમિયાન એક રાહદારીએ સમગ્ર ઘટનાનો વીડિયો પોતાના મોબાઈલમાં ઉતારી લીધો હતો, જે ગઈકાલે સોશિયલ મીડિયામાં વાઈરલ થતાં ચર્ચાનો વિષય બન્યો હતો.બીજી તરફ, બંને મહિલાઓએ રિક્ષાચાલક સાથે બોલાચાલી અને મારામારી કર્યા બાદ પોતાનું સ્કૂટર લઈને ત્યાંથી ચાલતી પકડી હતી, જ્યારે રિક્ષાચાલક પણ કોઈ વધુ માથાકૂટ કર્યા વિના રિક્ષા ચાલુ કરીને ત્યાંથી રવાના થઈ ગયો હતો.

જમીન પર દબાણના આક્ષેપોનો વીડિયો ઉતારી સોશિયલ મીડિયામાં મૂકવાની ધમકી આપી રૂા. ૫૦ હજારની માંગણી કર્યાનો આક્ષેપ

• કાલાવડના સેફરોન સ્કૂલના સંચાલક અને વોર્ડ નં. ૭ના કોર્પોરેટરની ફરિયાદઃ ‘આઈ લવ કાલાવડ’ પેજના સંચાલક સામે પોલીસમાં રજૂઆત

દેશ દેવી ન્યુઝ જામનગર તા. ૫,નવેમ્બર ૨૬ કાલાવડ તાલુકાના જાલણસર ગામે પોતાની પત્નીના નામે આવેલી જમીન પર સરકારી ખરાબાની જમીન પચાવી પાડવાના આક્ષેપો કરતો વીડિયો સોશિયલ મીડિયામાં પ્રસિદ્ધ નહીં કરવા માટે રૂા. ૫૦ હજારની માંગણી કરવામાં આવી હોવાનો આક્ષેપ ઉઠ્યો છે. આ મામલે કાલાવડની સેફરોન સ્કૂલના સંચાલક અને વોર્ડ નં. ૭ના કોર્પોરેટર રમેશભાઈ મોહનભાઈ દોંગાએ કાલાવડના વાલસી ગઢવી સામે પોલીસમાં ફરિયાદ નોંધાવી છે.ફરિયાદની વિગતો મુજબ, રમેશભાઈ દોંગાએ તા. ૨૭ જુલાઈ, ૨૦૨૧ના રોજ પોતાની પત્ની હીનાબેનના નામે જાલણસર ગામની સીમમાં રે.સ.નં. ૨૮૫ની કુલ ૧-૬૩-૩૦ હેક્ટર જમીન વેચાણથી ખરીદી હતી. દરમિયાન તા. ૨૯ ઓક્ટોબરના રોજ બપોરે તેમની સ્કૂલના ભાગીદાર વિવેકભાઈ ભંડેરીનો ફોન આવ્યો હતો. તેમણે ‘આઈ લવ કાલાવડ’ પેજના સંચાલક દ્વારા જમીનનો વીડિયો અને ઓડિયો મોકલવામાં આવ્યો હોવાનું જણાવ્યું હતું.આ વીડિયોમાં જમીન પર સરકારી ખરાબાની જગ્યા પર દબાણ કરવામાં આવ્યું હોવાના આક્ષેપો સાથે મહેસૂલ તંત્ર દ્વારા નિષ્પક્ષ તપાસ કરવાની માગણી કરવામાં આવી હતી. ત્યારબાદ વિવેકભાઈએ રમેશભાઈને જાણ કરી હતી કે પેજના સંચાલક વાલસી ગઢવીએ વીડિયો સોશિયલ મીડિયામાં પ્રસિદ્ધ નહીં કરવા માટે રૂા. ૫૦ હજારની માંગણી કરી છે. આ અંગે વિવેકભાઈએ મોબાઇલમાં વાતચીતનું રેકોર્ડિંગ પણ કર્યું હોવાનું ફરિયાદમાં જણાવાયું છે.ફરિયાદીના જણાવ્યા પ્રમાણે, નાણાં નહીં આપતાં વાલસી ગઢવીએ પોતાના ‘આઈ લવ કાલાવડ ૧’ નામના ઇન્સ્ટાગ્રામ પેજ પર જમીન અંગેના આક્ષેપો કરતો વીડિયો મૂક્યો હતો. તેમાં ભાજપના આગેવાન અને કોર્પોરેટર દ્વારા કરોડોની સરકારી જમીન પર દબાણ કરવામાં આવ્યું હોવાના આક્ષેપો કરવામાં આવ્યા હતા.આમ, વીડિયો પ્રસિદ્ધ નહીં કરવા માટે રૂા. ૫૦ હજારની માંગણી કરી નાણાં પડાવવાનો પ્રયાસ કરવામાં આવ્યો હોવાની તેમજ સોશિયલ મીડિયા પર ખોટા આક્ષેપો કરીને પોતાની પ્રતિષ્ઠાને નુકસાન પહોંચાડવામાં આવ્યું હોવાની રજૂઆત સાથે રમેશભાઈ દોંગાએ પોલીસ સમક્ષ ફરિયાદ નોંધાવી છે. આ સાથે વિવેકભાઈ દ્વારા કરવામાં આવેલા બે ઓડિયો રેકોર્ડિંગ પેનડ્રાઇવમાં રજૂ કરવામાં આવ્યા હોવાનું પણ ફરિયાદમાં જણાવાયું છે.

પરીક્ષામાં કેટી આવ્યા બાદ દાદાએ ઠપકો આપતાં કોલેજિયન યુવતીએ ગળાફાંસો ખાઈ જીવન ટૂંકાવ્યું

• જામનગરના હવાઈચોક વિસ્તારમાં કરુણ બનાવ : મોબાઇલ ઓછો જોઈ અભ્યાસમાં ધ્યાન આપવા દાદાએ સમજાવતાં મનમાં લાગી આવ્યું

દેશદેવી ન્યુઝ જામનગર તા ૨ :નવેમ્બર ૨૬ જામનગરના હવાઈચોક ભાનુશાળી વાડ વિસ્તારમાં રહેતી ૧૯ વર્ષની કોલેજિયન યુવતીએ પોતાના ઘરે ગળાફાંસો ખાઈ આપઘાત કરી લેતાં પરિવારમાં શોકની લાગણી ફેલાઈ છે.આ બનાવની પોલીસમાં જાહેર થયેલી વિગત મુજબ, હવાઈચોક ભાનુશાળી વાડ, શેરી નંબર-૮માં રહેતી પ્રિયંકાબેન હિતેશભાઈ કનખરા (૧૯) કોલેજમાં અભ્યાસ કરતી હતી. ગત વર્ષે પરીક્ષામાં તેને કેટી આવી હતી. આથી તેના દાદાએ મોબાઇલ ફોન ઓછો જોવા અને વાંચન તથા અભ્યાસમાં વધુ ધ્યાન આપવા સમજાવી ઠપકો આપ્યો હતો.દાદાની આ વાત યુવતીને મનમાં લાગી આવતાં તેણે ઘરના રસોડામાં છતના પંખા સાથે ચુંદડી બાંધી ગળાફાંસો ખાઈ લીધો હતો. જેના કારણે તેનું મૃત્યુ નીપજ્યું હતું.આ બનાવ અંગે મૃતક ના પિતા હિતેશભાઈ વિનુભાઈ કનખરાએ પોલીસને જાણ કરતાં સીટી એ. ડિવિઝન પોલીસે ભારતીય નાગરિક સુરક્ષા સંહિતાની કલમ ૧૯૪ મુજબ અકસ્માતે મૃત્યુ અંગે નોંધ કરી આગળની તપાસ હાથ ધરી છે.

વાસીદું કરવા નીકળેલી વૃદ્ધાને કાળમુખી કારની ટક્કર! ;જામનગર-રાજકોટ હાઈવે પર હિટ એન્ડ રન : કારની જોરદાર ટક્કરે વૃદ્ધા ગંભીર રીતે ઘાયલ!

• ફલ્લા ગામના ૬૩ વર્ષીય જયશ્રીબેન ધમસાણીયાને માથામાં ગંભીર ઈજા : અકસ્માત સર્જી કારચાલક નાસી છૂટ્યાની ફરિયાદ

દેશ દેવી ન્યુઝ જામનગર, તા. ૧નવેમ્બર ૨૬: જામનગર-રાજકોટ હાઈવે પર આવેલા ફલ્લા ગામ નજીક હિટ એન્ડ રનની ઘટના સામે આવી છે. વહેલી સવારે રસ્તો ઓળંગી રહેલી ૬૩ વર્ષીય વૃદ્ધાને પૂરઝડપે આવતી કારે અડફેટે લેતાં તેઓને માથાના ભાગે ગંભીર ઈજા પહોંચી હતી. અકસ્માત સર્જ્યા બાદ કારચાલક વાહન લઈને નાસી છૂટ્યો હોવાની ફરિયાદ પંચકોશી ‘એ’ ડિવિઝન પોલીસ મથકમાં નોંધાઈ છે.આ બનાવની મળતી વિગતો મુજબ, જામનગર તાલુકાના ફલ્લા ગામના પ્લોટ વિસ્તારમાં રહેતા ૬૮ વર્ષીય ખેડૂત બેચરભાઈ હિરાભાઈ ધમસાણીયાનાં પત્ની જયશ્રીબેન ઉર્ફે જયાબેન (ઉં.વ. ૬૩) ગત તા. ૩૧ ઓક્ટોબરના સવારે આશરે સાત વાગ્યે પોતાના ઘરેથી ગામ નજીક આવેલા વાડામાં વાસીદું કરવા માટે પગપાળા નીકળ્યાં હતાં.દરમિયાન સવા સાત વાગ્યાના અરસામાં જામનગર-રાજકોટ હાઈવે પર હનુમાનદાદાની ડેરી નજીક તેઓ રસ્તો ઓળંગી રહ્યાં હતાં. તે સમયે રાજકોટ તરફથી જામનગર તરફ આવતીજીજે-૦૩-એલજી-૧૦૯૭ નંબરની કારના ચાલકે પૂરઝડપે અને બેદરકારીપૂર્વક વાહન ચલાવી વૃદ્ધાને અડફેટે લીધાં હોવાનો ફરિયાદમાં આક્ષેપ કરવામાં આવ્યો છે.કારની જોરદાર ટક્કરથી વૃદ્ધા રસ્તા પર પટકાતાં માથાના ભાગે ગંભીર ઈજા પહોંચી હતી અને તેઓ બેભાન થઈ ગયાં હતાં. અકસ્માત બાદ કારચાલક વાહન ઊભું રાખવાને બદલે સ્થળ પરથી નાસી છૂટ્યો હોવાનું ફરિયાદમાં જણાવાયું છે.બનાવને પગલે આસપાસના લોકો ઘટનાસ્થળે એકત્ર થઈ ગયા હતા. સ્થાનિક નિલેશભાઈ નારણભાઈ ધમસાણીયાએ અકસ્માત અંગે વૃદ્ધાના પતિને જાણ કરી હતી. ત્યારબાદ પરિવારજનો દ્વારા ઈજાગ્રસ્ત વૃદ્ધાને સારવાર માટે રાજકોટ સિવિલ હોસ્પિટલમાં ખસેડવામાં આવ્યાં હતાં.ફરિયાદ મુજબ વૃદ્ધાને માથામાં ગંભીર ઈજા પહોંચી છે અને તેઓ બેભાન હાલતમાં હોસ્પિટલમાં સારવાર હેઠળ છે.આ બનાવ અંગે વૃદ્ધાના પતિ બેચરભાઈ ધમસાણીયાની ફરિયાદના આધારે પંચકોશી ‘એ’ ડિવિઝન પોલીસે સંબંધિત બી.એન.એસ. તથા મોટર વાહન અધિનિયમની કલમો હેઠળ ગુનો નોંધી કારચાલક સામે તપાસ હાથ ધરી છે.